وفاقی وزیرداخلہ محسن نقوی کی خیبرپختونخوا میں 2 مختلف آپریشنز میں فتنہ الخوارج کے 35 دہشتگردوں کو جہنم واصل کرنے پر سکیورٹی فورسز کی ستائش

ہفتہ 13 ستمبر 2025 15:03

اسلام آباد (اُردو پوائنٹ اخبارتازہ ترین - اے پی پی۔ 13 ستمبر2025ء) وفاقی وزیرداخلہ محسن نقوی نے خیبرپختونخوا میں 2 مختلف آپریشنز میں فتنہ الخوارج کے 35 دہشتگردوں کو جہنم واصل کرنے پر سکیورٹی فورسز کی ستائش کرتے ہوئے ان کی پیشہ وارانہ صلاحیتوں کو سراہا،انہوں نے خوارجی دہشتگردوں کو عبرتناک انجام تک پہنچانے والے سکیورٹی فورسز کے جوانوں کو سلام بھی پیش کیا۔

وزارت داخلہ کے مطابق محسن نقوی نے کہا کہ سکیورٹی فورسز نے بروقت آپریشنز کرکے خوارجی دہشتگردوں کے مذموم عزائم کو ناکام بنایا۔ انہوں نے سکیورٹی فورسز کی پیشہ وارانہ صلاحیتوں کو سراہا اور کہا کہ خوارجی دہشتگردوں کو عبرتناک انجام تک پہنچانے والے سکیورٹی فورسز کے جوانوں کو سلام پیش کرتے ہیں۔

(جاری ہے)

وزیر داخلہ نے جنوبی وزیرستان میں خوارجی دہشتگردوں کے خلاف بہادری سے لڑتے ہوئے جام شہادت نوش کرنے والے سکیورٹی فورسز کے 12 جوانوں کو خراج عقیدت بھی پیش کیا۔

وزیرداخلہ نے شہدا کے لواحقین سے دلی ہمدردی اور اظہار تعزیت کرتے ہوئے کہا کہ شہدا کی قربانیاں دہشت گردی خلاف ہمارے مضبوط عزم کی عکاس ہیں، امن کےلئے وطن پر جانیں نچھاور کرنے والے شہدا ہمارا فخر ہیں، قوم شہدا کے خاندانوں کا قرض کبھی نہیں اتار سکتی۔\932