صدر مملکت آصف علی زر داری اور وزیر اعظم شہبازشریف کا فتنتہ الخوارج کے دہشت گردوں کے خلاف کارروائیوں پر سکیورٹی فورسز کو خراج تحسین

ہفتہ 13 ستمبر 2025 17:07

اسلام آباد (اُردو پوائنٹ اخبارتازہ ترین - این این آئی۔ 13 ستمبر2025ء) صدر مملکت آصف علی زر داری اور وزیر اعظم شہبازشریف نے فتنتہ الخوارج کے دہشت گردوں کے خلاف کارروائیوں پر سکیورٹی فورسز کو خراج تحسین پیش کرتے ہوئے کہاہے کہ ملک سے ہر قسم کی دہشت گردی کے مکمل خاتمے کے لئے پر عزم ہیں، پاکستان کو تشدد سے جھکایا نہیں جا سکتا،فتنہ الخوارج اور ان کے سرپرستوں کو شکست دی جائے گی۔

وزیراعظم آفس کے میڈیاونگ سے جاری بیان میںوزیراعظم محمد شہباز شریف نے ضلع باجوڑ اور ضلع جنوبی وزیرستان میں فتنتہ الخوارج کے دہشت گردوں کے خلاف کامیاب کارروائیوں پر سکیورٹی فورسز کو خراج تحسین پیش کیا۔ وزیراعظم محمد شہباز شریف نے ان آپریشنز میں فتنتہ الخوارج کے 35 دہشت گردوں کو ہلاک کرنے پر سکیورٹی فورسز کی پذیرائی کی۔

(جاری ہے)

وزیراعظم نے ضلع جنوبی وزیرستان کے آپریشن میں دہشت گردوں کا بہادری سے مقابلہ کرتے ہوئے جام شہادت نوش کرنے والے سکیورٹی فورسز کے 12 جوانوں کو خراج عقیدت پیش کیا۔

وزیراعظم نے شہدا کے بلنددرجات کی دعا کی اور ان کے اہل خانہ س یتعزیت کا اظہار کیا۔ وزیر اعظم نے کہا کہ دہشت گردی کے خلاف جنگ میں سکیورٹی فورسز سیسہ پلائی دیوار کی طرح کھڑی ہیں ، پوری قوم شہدا کو سلام پیش کرتی ہے۔ وزیر اعظم نے کہا کہ ملک سے ہر قسم کی دہشت گردی کے مکمل خاتمے کے لئے پر عزم ہیں۔ اپنے بیان میں صدر مملکت آصف علی زرداری نے باجوڑ اور جنوبی وزیرستان میں شہید ہونے والے سکیورٹی فورسز کے 12 جوانوں کو خراجِ عقیدت پیش کرتے ہوئے کہا کہ فتنہ الخوارج اور ان کے سرپرستوں کو شکست دی جائے گی۔

صدر مملکت آصف علی زرداری نے بہادر سپاہیوں کی قربانی پر گہرے دکھ اور افسوس کا اظہار کیا۔ صدر مملکت نے کہا کہ شہداکا خون دہشت گردی کے خاتمے کے عزم کو مزید مضبوط کرتا ہے۔ صدر مملکت نے بھارتی حمایت یافتہ فتنہ الخوارج کی مذمت کرتے ہوئے کہا کہ افغان سرزمین کے دہشت گردی میں استعمال پر شدید تشویش ہے، افغان عبوری حکومت اپنی ذمہ داریاں پوری کرے۔ صدرمملکت آصف علی زرداری نے کہا کہ پاکستان کو تشدد سے جھکایا نہیں جا سکتا، فتنہ الخوارج اور ان کے سرپرستوں کو شکست دی جائے گی۔