پی ٹی آئی سابق رکن اسمبلی جمشید دستی کی نااہلی کے خلاف دائر چار مختلف درخواستوں پر سماعت کل ہوگی

ا*لاہور ہائی کورٹ نے پہلے ہی اس حلقے میں ضمنی انتخاب معطل کررکھاہے

اتوار 14 ستمبر 2025 18:00

لاہور(اُردو پوائنٹ اخبارتازہ ترین - آن لائن۔ 14 ستمبر2025ء)لاہور ہائی کورٹ میں پی ٹی آئی سابق رکن اسمبلی جمشید دستی کی نااہلی کے خلاف دائر چار مختلف درخواستوں پر سماعت کل (منگل) 16 ستمبرکوہوگی۔عدالت نے پہلے ہی اس حلقے میں ضمنی انتخاب معطل کررکھاہے۔لاہور ہائی کورٹ کے تین رکنی فل بنچ نے چیف جسٹس عالیہ نیلم کی سربراہی میں جمشید دستی کی نااہلی کے خلاف دائر چار مختلف درخواستوں پر سماعت کرے گا، جسٹس حسن نواز مخدوم اور جسٹس خالد اسحاق بھی بنچ میں شامل ہیں۔

(جاری ہے)

ساقبہ سماعت پرعدالت نے عدم پیشی پر برہمی کا اظہار کرتے ہوئے اٹارنی جنرل آف پاکستان کو نوٹس جاری کرتے ہوئے ذاتی حیثیت میں پیش ہونے کے ہدایت کی اور تحریری دلائل بھی مانگ لیے تھے۔۔ عدالت نے اٹارنی جنرل کے پیش نہ ہونے پر برہمی کا اظہار کیا، ایڈیشنل اٹارنی جنرل نصر احمد نے جواب داخل کرانے کے لیے مہلت طلب کی۔عدالت نے سپیکر قومی اسمبلی اور الیکشن کمیشن کے وکیل کو بھی نوٹس جاری کر کے جواب طلب کر لیا اور ہدایت دی کہ اگلی سماعت سے کیس روزانہ کی بنیاد پر چلایا جائے گا۔واضح رہے کہ عدالت نے این اے 175 مظفر گڑھ کے انتخابی شیڈول کو معطل کر رکھا ہے اور درخواست میں الیکشن کمیشن کے فیصلے اور عدالتی دائرہ اختیار کو چیلنج کیا گیا ہے۔