لاہور ہائیکورٹ،محکمہ اوقاف کی اراضی واگزار کروانے کی دائر درخواست پر ریونیو ریکارڈ کی فائل طلب

پیر 15 ستمبر 2025 16:15

لاہور (اُردو پوائنٹ اخبارتازہ ترین - اے پی پی۔ 15 ستمبر2025ء) لاہور ہائیکورٹ نے محکمہ اوقاف پنجاب کی اراضی واگزار کروانے کی دائر درخواست پر ریونیو ریکارڈ کی فائل طلب کر لی،جسٹس فاروق حیدرنے سیکرٹری اوقاف پنجاب کی درخواست پر سماعت کی،دوران سماعت ڈی آئی جی آپریشنز فیصل کامران اسسٹنٹ ایڈووکیٹ جنرل محمد ادریس رفیق بھٹی کے ہمراہ پیش ہوئے،عدالت نے استفسار کیا کہ کیا یہ معاملہ سول کورٹ میں زیرالتوا ہے؟وکیل نے بتایا کہ سول کورٹ میں کیسز زیرِسماعت ہیں،جس پر جسٹس فاروق حیدرنے ریمارکس دیئے کہ ہائیکورٹ سول کورٹ کا آرڈر پہلے ہی معطل کرچکی ہے، وکیل نے موقف اپنایا کہ یہ وہ اراضی نہیں بلکہ اس پر اینٹی کرپشن کورٹ میں مقدمہ درج ہوا تھا،عدالت نے واضح کیا کہ اینٹی کرپشن کا مقدمہ الگ نوعیت کا ہے جس کا اس کیس سے کوئی تعلق نہیں،عدالت نے ڈی آئی جی آپریشنز سے استفسار کیا کہ اگرمحکمہ اوقاف اپنی اراضی واگزار کروانے کیلئے پولیس سے مدد طلب کرے تو کیا اقدام ہوگا؟جس پر ڈی آئی جی نے کہا کہ پولیس مکمل تعاون کرے گی،عدالت نے ریونیو ریکارڈ کی فائل طلب کرتے ہوئے سماعت ملتوی کردی۔