ضلعی انتظامیہ کوئٹہ کی پرائس کنٹرول کے تحت ممنوعہ پولیتھین بیگز، منی پیٹرول پمپس اور تجاوزات کے خلاف بھرپور کاروائیاں

پیر 15 ستمبر 2025 22:50

کوئٹہ (اُردو پوائنٹ اخبارتازہ ترین - اے پی پی۔ 15 ستمبر2025ء) ضلعی انتظامیہ کوئٹہ نے پرائس کنٹرول کے تحت ممنوعہ پولیتھین بیگز، منی پیٹرول پمپس اور تجاوزات کے خلاف بھرپور کاروائیاں کیں۔ اس موقع پر 170 دکانوں و مارکیٹوں کا معائنہ کرکے37 افراد کوگرفتار جبکہ 25 افراد کو جیل منتقل کردیا گیا ۔اس موقع پر 8 دکانیں سیل،75 کلوگرام پلاسٹک بیگز ضبط،2 منی پیٹرول پمپس سیل اور27 دکانداروں پر جرمانے عائد کردیے گئے۔

ان کارروائیوں کے دوران بیف شاپس، مٹن شاپس، ڈیری فارمز، ملک شاپس، تندور، پولیتین بیگز اور منی پیٹرول پمپس کے خلاف سخت اقدامات کیے گئے۔اسپیشل مجسٹریٹ عزت اللہ نے سب ڈویڑن سریاب، لیاقت علی جتوئی نے میزان چوک، مسجد روڈ، طوغی روڈ سمیت دیگر علاقوں میں پرائس کنٹرول و تجاوزات کے خلاف کارروائیاں کیں۔

(جاری ہے)

اسپیشل مجسٹریٹ اعجاز حسین کھوسہ نے سب ڈویڑن سٹی میں ممنوعہ پلاسٹک بیگز ضبط کیے، جبکہ اسپیشل مجسٹریٹ حسیب سردار نے نواں کلی، عالمو چوک اور جناح ٹاؤن میں پرائس کنٹرول اقدامات کیے جبکہ اسسٹنٹ کمشنر کچلاک کی زیر نگرانی کچلاک بازار میں بیف، مٹن اور پولٹری شاپس کے خلاف سخت کاروائیاں عمل میں لائی گئیں۔

ضلعی انتظامیہ نے واضح کیا ہے کہ عوامی مفاد کے خلاف منافع خوری، غیر قانونی پٹرول پمپس اور ممنوعہ پولیتین بیگز کسی صورت برداشت نہیں کیے جائیں گے۔