Live Updates

گڈو اورسکھر بیراج پر اونچے درجے کا سیلاب، عوام کو تنہا نہیں چھوڑیں گے‘ شرجیل میمن

متاثرین کے کھانے، پینے، علاج معالجے اور جانوروں کی دیکھ بھال کا بھی مکمل بندوبست کیا جا رہا ہے،بیان جاری

منگل 16 ستمبر 2025 11:42

گڈو اورسکھر بیراج پر اونچے درجے کا سیلاب، عوام کو تنہا نہیں چھوڑیں ..

کراچی(اُردو پوائنٹ اخبارتازہ ترین - این این آئی۔ 16 ستمبر2025ء) سندھ کے سینئر وزیر شرجیل انعام میمن نے کہا ہے کہ حکومت سندھ قدرتی آفات اور ہنگامی صورتحال میں عوام کو ہر ممکن ریلیف فراہم کرنے کیلئے ہمہ وقت سرگرم ہے، قدرتی آفات میں عوام کو تنہا نہیں چھوڑیں گے۔اپنے بیان میں شرجیل میمن کا کہنا تھا کہ ریلیف آپریشن کے دوران متاثرین کو نہ صرف محفوظ مقامات پر منتقل کیا جا رہا ہے، متاثرین کے کھانے، پینے، علاج معالجے اور جانوروں کی دیکھ بھال کا بھی مکمل بندوبست کیا جا رہا ہے، سندھ حکومت عوام کو اکیلا نہیں چھوڑے گی اور ہر ضرورت کے وقت ان کے ساتھ کھڑی ہے۔

انہوں نے کہا کہ حکومت کے تمام ادارے، ضلعی انتظامیہ اور ریسکیو ٹیمیں متاثرین کی مدد میں دن رات مصروف ہیں تاکہ زیادہ سے زیادہ جانیں اور املاک محفوظ بنائی جا سکیں۔

(جاری ہے)

ان کا کہنا تھا کہ گڈو اور سکھر پر اونچے درجے کا جبکہ کوٹری پر نچلے درجے کا سیلاب ہے، گڈو پر پانی کی آمد 624,456 اور اخراج 594,936 کیوسک ہے، جبکہ سکھر پر آمد 560,890 اور اخراج 508,830 کیوسک ہے، اس کے علاوہ کوٹری پر پانی کی آمد 284,325 کیوسک اور اخراج 273,170 کیوسک ہے۔

شرجیل میمن نے کہا کہ صوبے میں گزشتہ 24 گھنٹوں کے دوران 3,522 افراد کو محفوظ مقامات پر منتقل کیا گیا، اب تک محفوظ مقام پر منتقل ہونے والوں کی کل تعداد 1,73,027 ہوگئی ہے، ان میں سے 469 افراد اب بھی ریلیف کیمپس میں مقیم ہیں۔ان کا کہنا تھا کہ صوبے میں 183 فکسڈ اور موبائل ہیلتھ سائٹس کام کر رہی ہیں جہاں گزشتہ 24 گھنٹوں میں 4,174 سے زائد مریضوں کا علاج کیا گیا، اب تک علاج معالجہ حاصل کرنے والوں کی مجموعی تعداد 92,958 تک پہنچ گئی ہے۔

صوبائی وزیر نے مزید کہا کہ حکومت سندھ کی جانب سے لائیو سٹاک کے تحفظ کیلئے بھی اقدامات جاری ہیں، گزشتہ 24 گھنٹوں میں 3,192 مویشی محفوظ مقامات پر منتقل کئے گئے، اب تک 4,50,571 مویشیوں کو منتقل کیا جا چکا ہے، گزشتہ 24 گھنٹوں میں 39,589 مویشیوں کو ویکسین اور طبی سہولیات فراہم کی گئیں، اب تک کل 13,05,573 مویشیوں کو علاج و ویکسین فراہم کی جا چکی ہے۔