نظام صحت کوجدیدخطوط پراستوارکررہے ہیں، ہسپتالوں میں مریضوں کو ہرممکن سہولیات کی فراہمی ترجیح ہے، وفاقی وزیر قومی صحت سید مصطفی کمال

منگل 16 ستمبر 2025 16:48

اسلام آباد (اُردو پوائنٹ اخبارتازہ ترین - اے پی پی۔ 16 ستمبر2025ء) وفاقی وزیر برائے قومی صحت سید مصطفی کمال نے کہا ہے کہ ہمیں عوام کو مریض بننے سے بچانا ہے،مچھر عوام کو ڈینگی وائرس میں مبتلا کر رہا ہے ، شہروں اور دیہات میں ڈینگی کے کیسز بڑھ رہے ہیں ۔ان خیالات کا اظہار انہوں نے قومی انسداد ڈینگی مہم 2025 کے آغاز کی تقریب سے خطاب کرتے ہوئے کیا۔

انہوں نے کہا کہ میں اسلام آباد کے تینوں ایم این ایز سے درخواست کرتا ہوں کہ ڈینگی سے بچاؤ کی مہم کا حصہ بنیں۔انہوں نے کہا کہ انسانیت کی خدمت ہمارانصب العین ہونا چاہیے ،اللہ کی مخلوق کوبیماری سے بچانے کی کوشش ثواب ہے ۔مصطفی کمال نے کہا کہ ہسپتالوں میں مریضوں کو ہرممکن سہولیات کی فراہمی ہماری ترجیح ہے،ہمیں ہسپتالوں میں مریضوں کا انتظار نہیں کرنا۔

(جاری ہے)

انہوں نے کہا کہ ہماری وزارت دوسری وزارتوں سے مختلف ہے ہمارے اوپر ذمہ داری زیادہ ہے ہمیں اس پر سوچ سمجھ کر توجہ سے کام کرنا ہے۔انہوں نے کہا کہ ہمارا مذہب اسلام ہمیں اللہ کی ہر مخلوق سے محبت کا درس دیتا ہے،جب آپ اللہ کی مخلوق کی مدد کریں گے تو اللہ خوش ہو گا۔انہوں نے ہیلتھ ورکرز سے مخاطب ہوتے ہوئے کہا کہ یہ وزارت اللہ کی مخلوق کی مدد کرنے والی ہے،آپ سب ورکرز اہم ہیں کیوں کہ آپ اللہ کی مخلوق کو بچا رہے ہیں ۔

انہوں نے کہا کہ ہمارے پاس اتنے زیادہ وسائل نہیں ہیں ہم مشینیں اور گاڑیوں کو بڑھانے کی کوشش کر رہے ہیں ۔آپ سب ورکرز ڈینگی مہم کو کامیاب بنائیں۔انہوں نے بتایا کہ ہم نے کل سروائیکل کینسر سے بچائو کی ویکسینیشن مہم کا آغاز کیا ہے،نظام صحت کوجدیدخطوط پراستوارکررہے ہیں۔