ڈائریکٹر یوتھ افئرز نے ہری پور اور صوابی میں جوان مراکز میں تعمیراتی کاموں کا جائزہ لیا

منگل 16 ستمبر 2025 19:55

پشاور(اُردو پوائنٹ اخبارتازہ ترین - این این آئی۔ 16 ستمبر2025ء)ڈائریکٹر یوتھ افئرز خیبرپختونخوا ڈاکٹر نعمان مجاہد نے ہری پور اور صوابی کے اضلاع میں زیر تعمیر جوان مراکز کا دورہ کیا اور وہاں پر جاری ترقیاتی منصوبوں کی پیشرفت کا جائزہ لیا۔ اس دوران انہوںنے منصوبوں کے مختلف حصوں کا معائنہ کرتے ہوئے ہدایت کی کہ تعمیراتی کام منظور شدہ ڈیزائن اور معیارات کے مطابق یقینی بنایا جائے۔

انہوں نے واضح کیا کہ کسی قسم کا ناقص اور غیر معیاری تعمیراتی کام برداشت نہیں کیا جائے گا۔ڈاکٹر نعمان مجاہد نے کہا کہ جوان مراکز صوبائی حکومت کے فلیگ شپ منصوبے ہیں جنہیں نوجوانوں کو جدید سہولیات اور مواقع فراہم کرنے کے لیے قائم کیا جا رہا ہے، اس لیے ان منصوبوں کی بروقت اور اعلیٰ معیار کے مطابق تکمیل ناگزیر ہے۔

(جاری ہے)

انہوں نے متعلقہ حکام کو ہدایت کی کہ تعمیراتی عمل کے ہر مرحلے پر سخت نگرانی کو یقینی بنایا جائے۔

ڈائریکٹر یوتھ افئرز نے بتایا کہ اس وقت مردان، صوابی، ڈیرہ اسماعیل خان، بونیر، پشاور (یوتھ کمپلیکس)، ہری پور، مہمند، جنوبی وزیرستان، شمالی وزیرستان اور لوئر وزیرستان میں جوان مراکز زیر تعمیر ہیں۔انہوں نے مزید کہا کہ منصوبے کے دوسرے مرحلے کے تحت پانچ نئے جوان مراکز شانگلہ، چارسدہ، اپر چترال، بنوں اور کوہاٹ میں بھی جلد منظور کیے جائیں گے۔ڈائریکٹر یوتھ افئرز نے صوبائی وزیر کھیل و امورِ نوجوانان سید فخر جہان کی زیر نگرانی صوبائی حکومت کے نوجوانوں کی بااختیار بنانے کے عزم کو دہراتے ہوئے کہا کہ ان مراکز کی تکمیل سے نوجوانوں کو جدید سہولیات میسر آئیں گی جہاں وہ اپنی صلاحیتوں کو نکھار سکیں گے اور مثبت سرگرمیوں میں حصہ لے سکیں گے۔