چین کے ساتھ ٹک ٹاک کے حوالے سےمعاہدہ طے پا گیا ہے،امریکا

بدھ 17 ستمبر 2025 10:40

واشنگٹن (اُردو پوائنٹ اخبارتازہ ترین - اے پی پی۔ 17 ستمبر2025ء) امریکی صدر ڈونلڈ ٹرمپ نے اعلان کیا ہے کہ چین کے ساتھ ٹک ٹاک کے حوالے سےمعاہدہ طے پا گیا ہے۔العربیہ اردو کے مطابق برطانیہ کے دورے پر روانگی سے قبل وائٹ ہاؤس میں صحافیوں سے گفتگو کرتے ہوئے ڈونلڈ ٹرمپ نے کہاکہ ہمارا چین کے ساتھ ٹک ٹاک پر معاہدہ طے پا گیا ہے۔ انہوں نے کہا کہ جمعے کو میں چین کے صدر شی جن پنگ سے بات کروں گا تاکہ سب معاملات کی تصدیق ہو جائے۔

(جاری ہے)

یاد رہے کہ امریکی وزیر خزانہ سکاٹ بَیسَنٹ نے گزشتہ روز کہا تھا کہ سپین میں امریکا اور چین کے درمیان ہونے والی بات چیت کے بعد طے پانے والے معاہدے کے تحت ٹک ٹاک کی ملکیت امریکا میں ہوگی۔انہوں نے کہا کہ فی الحال تجارتی شرائط پر بات نہیں کی جائے گی البتہ مذاکرات کے دوران مستقبل میں مشترکہ اقدامات پر بھی تبادلہ خیال ہوا ہے۔امریکی تجارتی کمشنر جیمیسن گریر نے کہا کہ امریکا اور چین ٹک ٹاک کے معاملے پر ایک مشکل اور حساس مسئلے کو حل کرنے میں کامیاب ہوگئے ہیں۔ ان کے مطابق فریم ورک معاہدےکے تحت ٹک ٹاک امریکی کنٹرول میں چلا جائے گا جبکہ دونوں ممالک کے تعلقات باہمی احترام پر قائم رہیں گے۔