وزیرداخلہ محسن نقوی کی تربت میں فرنٹیئر کور سائوتھ کے ہیڈ کوارٹر میں شہید کیپٹن وقار احمد اور 4 جوانوں کی نماز جنازہ میں شرکت

بدھ 17 ستمبر 2025 11:00

اسلام آباد (اُردو پوائنٹ اخبارتازہ ترین - اے پی پی۔ 17 ستمبر2025ء) وفاقی وزیرداخلہ محسن نقوی نے تربت میں فرنٹیئر کور سائوتھ کے ہیڈ کوارٹر میں آئی جی ایف سی سائوتھ میجر جنرل بلال سرفراز خان کے ہمراہ شہید کیپٹن وقار احمد اور 4 جوانوں کی نماز جنازہ میں شرکت کی۔ ترجمان وزارت داخلہ کے مطابق وفاقی وزیرداخلہ محسن نقوی نے جام شہادت نوش کرنے والے کیپٹن وقار،نائیک عصمت اللہ، لانس نائیک جنید احمد و خان محمد اور سپاہی محمد ظہور کو خراج عقیدت پیش کیا ۔

وزیرداخلہ محسن نقوی اور آئی جی ایف سی سائوتھ میجر جنرل بلال سرفراز نے شہداء کے بلندی درجات کیلئے دعا کی۔وزیرداخلہ محسن نقوی اور آئی جی ایف سی میجر جنرل بلال سرفراز نے شہداء کے جسد خاکی کو کندھا بھی دیا۔

(جاری ہے)

وزیر داخلہ محسن نقوی کا کہنا تھا کہ کیپٹن وقار احمداورجوانوں نے فرض کی راہ میں قیمتی جانیں نچھاور کرکے اعلی مثال قائم کی، قوم شہداء کی لازوال قربانیوں کا قرض نہیں اتار سکتی،شہداء کی عظیم قربانیاں رائیگاں نہیں جائیں گی۔

محسن نقوی نے کہا کہ شہداء اور ان کے عظیم خاندانوں کو سلام پیش کرتے ہیں ،شہداء کے خاندان ہمارے اپنے خاندان ہیں، قوم ہمیشہ انکی مقروض رہےگی۔ میجر جنرل بلال سرفراز نے کہا کہ سکیورٹی فورسز کی قربانیاں دہشت گردی کے خلاف ہمارے غیر متزلزل عزم کاثبوت ہیں۔نماز جنازہ میں اعلی عسکری و سول حکام نے شرکت کی۔