ایم پی اے گوادر مولانا ہدایت الرحمٰن کی ڈائریکٹر جنرل جی ڈی اے سے ملاقات

بدھ 17 ستمبر 2025 16:59

کوئٹہ (اُردو پوائنٹ اخبارتازہ ترین - اے پی پی۔ 17 ستمبر2025ء) رکن صوبائی اسمبلی مولانا ہدایت الرحمٰن نے ڈائریکٹر جنرل گوادر ڈویلپمنٹ اتھارٹی معین الرحمٰن خان سے ان کے دفتر میں ملاقات کی۔ اس موقع پر چیف انجینئر جی ڈی اے حاجی سید محمد، پراجیکٹ ڈائریکٹر واٹر میرجان بلوچ سمیت دیگر افسران بھی موجود تھے۔چیف انجینئر حاجی سید محمد نے جی ڈی اے کے جاری ترقیاتی منصوبوں، بالخصوص اولڈ ٹاؤن بحالی منصوبے اور دیگر ترقیاتی اقدامات میں پیشرفت پر آگاہی دی۔

پراجیکٹ ڈائریکٹر واٹر میرجان بلوچ نے گوادر میں پانی کی موجودہ صورتحال، مستقبل کے اقدامات اور گزشتہ روز وزیراعلیٰ بلوچستان کی زیر صدارت اجلاس میں ہونے والے فیصلوں پر عملدرآمد سے متعلق آگاہ کیا۔مولانا ہدایت الرحمٰن نے کہا کہ گوادر شہر میں پانی کی فراہمی کا پورا نظام جی ڈی اے کے سپرد کیا جا رہا ہے، جو ایک خوش آئند فیصلہ ہے۔

(جاری ہے)

انہوں نے زور دیا کہ جی ڈی اے کی بچھائی گئی نئی پائپ لائنوں کو فوری طور پر فعال کیا جائے تاکہ شہریوں کو بروقت پانی کی فراہمی ممکن ہو سکے۔

اس موقع پر انہوں نے کہا کہ ہاؤس کنکشن فیس میں رعایت دی جائے گی اور اس سلسلے میں وہ ذاتی طور پر بھی تعاون کریں گے۔ انہوں نے عوام سے اپیل کی کہ وہ ہاؤس کنکشن کے لیے فوری طور پر درخواستیں جمع کرائیں تاکہ گھروں تک نئی لائنوں کے ذریعے پانی کی سپلائی شروع کی جا سکے۔ڈائریکٹر جنرل جی ڈی اے معین الرحمٰن خان نے کہا کہ جی ڈی اے شہر میں پانی کی بلا تعطل فراہمی کے لیے دن رات کام کر رہی ہے، جس کے لیے شادی کور سے گوادر تک مختلف ٹیمیں مصروف عمل ہیں۔ انہوں نے کہا کہ پانی کی فراہمی کی مکمل ذمہ داری جی ڈی اے کو دینا ادارے کی کارکردگی اور عوامی اعتماد کاثبوت ہے۔ انہوں نے اس بات پر زور دیا کہ ان منصوبوں کی کامیابی کے لیے عوامی نمائندوں اور عوام کا تعاون ناگزیر ہے۔