رکن صوبائی اسمبلی مولانا ہدایت الرحمٰن کی ڈائریکٹر جنرل جی ڈی اے سے ملاقات، گوادر میں پانی کی فراہمی اور ترقیاتی منصوبوں پر گفتگو

بدھ 17 ستمبر 2025 20:00

کوئٹہ (اُردو پوائنٹ اخبارتازہ ترین - اے پی پی۔ 17 ستمبر2025ء) رکن بلوچستان اسمبلی مولانا ہدایت الرحمٰن نے بدھ کو ڈائریکٹر جنرل گوادر ڈویلپمنٹ اتھارٹی معین الرحمٰن خان سے ان کے دفتر میں ملاقات کی۔ اس موقع پر چیف انجینئر جی ڈی اے حاجی سید محمد، پروجیکٹ ڈائریکٹر واٹر میرجان بلوچ سمیت دیگر افسران بھی موجود تھے۔چیف انجینئر حاجی سید محمد نے جی ڈی اے کے جاری ترقیاتی منصوبوں، بالخصوص اولڈ ٹاؤن بحالی منصوبے اور دیگر ترقیاتی اقدامات میں پیشرفت پر آگاہی دی۔

پروجیکٹ ڈائریکٹر واٹر میرجان بلوچ نے گوادر میں پانی کی موجودہ صورتحال، مستقبل کے اقدامات اور گزشتہ روز وزیراعلیٰ بلوچستان کی زیر صدارت اجلاس میں ہونے والے فیصلوں پر عملدرآمد سے متعلق آگاہ کیا۔ رکن صوبائی اسمبلی مولانا ہدایت الرحمٰن نے کہا کہ گوادر شہر میں پانی کی فراہمی کا پورا نظام جی ڈی اے کے سپرد کیا جا رہا ہے، جو خوش آئند فیصلہ ہے اس لیے اب جی ڈی اے کی بچھائی گئی نئی پائپ لائنوں کو فوری طور پر فعال بنایا جائے تاکہ شہریوں کو بروقت پانی کی فراہمی ممکن بن سکے۔

(جاری ہے)

انہوں نے کہا کہ ہاؤس کنکشن فیس میں رعایت دی جائے گی اور اس سلسلے میں وہ ذاتی طور پر بھی تعاون کریں گے۔ رکن صوبائی اسمبلی نے عوام سے اپیل کی کہ وہ ہاؤس کنکشن کے لیے فوری طور پر درخواستیں جمع کرائیں تاکہ گھروں تک نئی لائنوں کے ذریعے پانی کی سپلائی شروع کی جا سکے۔ڈائریکٹر جنرل جی ڈی اے معین الرحمٰن خان نے کہا کہ جی ڈی اے شہر میں پانی کی بلا تعطل فراہمی کے لیے دن رات کام کر رہی ہے، جس کے لیے شادی کور سے گوادر تک مختلف ٹیمیں مصروف عمل ہیں۔