عمران خان اور بشریٰ بی بی کی سزا معطلی کی درخواستیں سماعت کیلئے مقرر

اسلام آباد ( اُردو پوائنٹ اخبارتازہ ترین۔ 18 ستمبر 2025ء ) پاکستان تحریک انصاف کے پیٹرن انچیف عمران خان اور ان کی اہلیہ بشریٰ بی بی کی سزا معطلی کی درخواستیں سماعت کیلئے مقرر کردی گئیں۔ تفصیلات کے مطابق اسلام آباد ہائیکورٹ میں 190 ملین پاؤنڈ کیس میں عمران خان اور بشریٰ بی بی کی سزا معطلی کی درخواستیں 25 ستمبر کو سماعت کے لیے مقرر کی گئی ہیں جہاں چیف جسٹس سرفراز ڈوگر اور جسٹس اعظم خان سماعت کریں گے۔

بتایا گیا ہے کہ اس سے پہلے سزا معطلی درخواستوں پر تین ماہ قبل 26 جون کو آخری سماعت ہوئی تھی، اس کے بعد کیس مقرر نہیں ہو رہا تھا تو جلد سماعت کی متفرق درخواست دی گئی وہ منظور ہونے کے بعد بھی کیس مقرر نہیں ہوا، جس پر آج عمران خان کی ہمشیرہ علیمہ خان وکلاء کے ہمراہ اسلام آباد ہائیکورٹ کے چیف جسٹس سرفراز ڈوگر کے سیکرٹری کے آفس گئیں جہاں چیف جسٹس سے پیغام رسانی کے بعد 25 ستمبر کی تاریخ کی یقین دہانی کروائی گئی اور اب کازلسٹ بھی جاری کر دی گئی۔

(جاری ہے)

چند روز قبل اسلام آباد ہائیکورٹ میں 190 ملین پاؤنڈ نیب کیس میں عمران خان اور بشریٰ بی بی سزا معطلی کی درخواست جلد سماعت کے لیے مقرر کرنے کی متفرق درخواست پر سماعت ہوئی تھی جہاں چیف جسٹس سردار سرفراز ڈوگر اور جسٹس اعظم خان پر مشتمل بینچ نے درخواستوں پر سماعت کی، درخواست گزاروں کے وکیل سلمان صفدر نے مؤقف اپنایا کہ ’نیب کی جانب سے پہلے کہا جاتا رہا کہ پراسیکیوٹر تعینات کرنا ہے، پہلے نیب نے دو بار کہا کہ پراسیکیوٹر تعینات نہیں ہوئے پھر پراسیکیوٹر نے پیش ہو کر کہا کہ ہمیں وقت دیدیں‘، جس پر چیف جسٹس اسلام آباد ہائیکورٹ نے ریمارکس دیئے کہ ’یہ پرانی باتیں ہو گئی ہیں‘، بیرسٹر سلمان صفدر نے یاد دہانی کرائی کہ ’پانچ تاریخیں ہو گئی ہیں ہمارا تو کیس نہیں لگ رہا‘، اس جسٹس سرفراز ڈوگر نے استفسار کیا کہ ’یہ کون سی درخواست ہے جو آج فکس ہے؟‘، بیرسٹر سلمان صفدر نے بتایا کہ ’ہماری جلد سماعت کی دو متفرق درخواستیں ہیں‘۔

چیف جسٹس اسلام آباد ہائیکورٹ نے پوچھا کہ ’عمران خان والے میں نوٹس ہوا ہے؟‘، بیرسٹر سلمان صفدر نے بتایا کہ ’نوٹس تو بہت پہلے ہو چکا اس کے بعد تو نیب نے تاریخیں بھی لی ہیں، یہ تو سزا معطلی کی درخواستیں جلد سماعت کیلئے مقرر کرنے کی متفرق درخواستیں ہیں، ہم نے کبھی میڈیکل گراؤنڈ نہیں لیا حالاں کہ بشریٰ بی بی کی طبیعت بھی ٹھیک نہیں ہے، دونوں کو تمام کیسز میں بریت یا ضمانت مل چکی ہے، اس کیس میں خاتون بھی ہیں اور 8 ماہ ہوگئے ہیں یہ سزا معطلی درخواست ہے، فیصلہ تو آپ نے کرنا ہے لیکن ہماری صرف استدعا ہے کہ خاتون کی حد تک سزا معطلی پر جلد سماعت کی جائے اور اگلے ہفتے سماعت کیلئے کیس مقرر کیا جائے‘۔

عمران خان و بشریٰ بی بی کے وکیل نے ڈویژن بنچ کے سربراہ جسٹس سرفراز ڈوگر کو مخاطب کر کے کہا کہ ’عمران خان اور بشریٰ بی بی کی سزا معطلی درخواستوں پر سماعت کیلئے آئندہ ہفتے کی تاریخ دے دیں، اگر آئندہ ہفتے کی تاریخ نہیں ملتی تو پھر تمام مشق لاحاصل ہے، پھر اگر سال بھی کیس نہ لگے تو میں نہیں آؤں گا‘، جس پر چیف جسٹس اسلام آباد ہوئیکورٹ نے جواب دیا کہ ’میں رجسٹرار آفس سے رپورٹ منگوا کر دیکھ لیتا ہوں‘، بعد ازاں عدالت نے عمران خان اور بشریٰ بی بی کی سزا معطلی کی درخواستیں رجسٹرار آفس کو جلد سماعت کیلئے مقرر کرنے کی ہدایت کردی۔