پولیس کی کارروائی، لڑکی کو ہراساں کرنے والا رکشہ ڈرائیور گرفتار

جمعرات 18 ستمبر 2025 17:51

لاہور (اُردو پوائنٹ اخبارتازہ ترین - این این آئی۔ 18 ستمبر2025ء) قلعہ گجر سنگھ پولیس نے لڑکی کو ہراساں کرنے کے واقعے میں فوری اور موثر کارروائی کرتے ہوئے ملزم کو 24گھنٹوں کے اندر گرفتار کر لیا۔پولیس نے جدید ہیومن انٹیلی جنس سسٹم کے ذریعے ملزم کا سراغ لگایا اور حاجی کیمپ کے علاقے سے اسے حراست میں لیا۔

(جاری ہے)

ترجمان لاہور پولیس کے مطابق لڑکی اپنی والدہ کے ہمراہ حاجی کیمپ کے قریب سے گھر واپس جا رہی تھی جب ایک رکشہ ڈرائیور نے راستے میں نازیبا حرکات کیں اور اسے ہراساں کیا، متاثرہ لڑکی کی جانب سے فوری طور پر تھانہ قلعہ گجر سنگھ میں شکایت درج کروائی گئی۔

ایس پی سِول لائنز چوہدری اثر علی نے واقعے کا نوٹس لیتے ہوئے فوری طور پر ایک خصوصی ٹیم تشکیل دی، جس نے جدید ٹیکنالوجی اور ہیومن انٹیلی جنس کی مدد سے ملزم کو تلاش کیا، پولیس نے حاجی کیمپ کے علاقے سے ملزم کو گرفتار کر لیا۔ترجمان پولیس کے مطابق گرفتار ملزم نے ابتدائی تفتیش کے دوران لڑکی کے ساتھ نازیبا حرکات کرنے کا اعتراف کر لیا ہے، اس کے خلاف تھانہ قلعہ گجر سنگھ میں مقدمہ نمبر 2817/25درج کر لیا گیا ہے اور مزید تفتیش جاری ہے۔