Live Updates

چوہدری شافع حسین سے پاکستان فرنیچر ایسوسی کے وفد کی ملاقات، فرنیچر انڈسٹری کو درپیش مسائل پر بات چیت

فرنیچر انڈسٹری کے مسائل کے حل کیلئے ہر ضروری اقدام کیا جائیگا،کسی کو بھی مقامی مینو فیکچرز کا استحصال نہیں کرنے دیں گے‘شافع حسین

جمعرات 18 ستمبر 2025 18:08

چوہدری شافع حسین سے پاکستان فرنیچر ایسوسی کے وفد کی ملاقات، فرنیچر ..

لاہور (اُردو پوائنٹ اخبارتازہ ترین - این این آئی۔ 18 ستمبر2025ء)صوبائی وزیر صنعت و تجارت چوہدری شافع حسین سے پاکستان فرنیچر ایسوسی کے وفد نے ملاقات کی۔وفد کی قیادت سرپرست اعلیٰ پاکستان فرنیچر ایسوسی میاں محمد افضال کر رہے تھے۔پیسک ہاؤس ہونے والی ملاقات میں فرنیچر انڈسٹری کو درپیش مسائل پر بات چیت ہوئی۔صوبائی وزیر نے فرنیچر انڈسٹری کے مسائل ترجیحی بنیادوں پر حل کرنے کی یقین دہانی کرائی۔

سرپرست اعلیٰ پاکستان فرنیچر ایسوسی ایشن میاں محمدافضال نے کہاکہ غیر منظم پنڈالوں اور شادی ہالوں میں فرنیچر کی نمائشوں سے فرنیچر انڈسٹری تباہی کے دہانے پر پہنچ چکی ہے،معیاری فرنیچر کی برآمد بڑھانے اور زرمبادلہ کے حصول کیلئے پنڈالوں اور شادی ہالوں میں فرنیچر کی نمائشیں بند کراکے مقامی مینو فیکچرز کا استحصال روکا جائے۔

(جاری ہے)

وفد نے لاہور میں عالمی معیار کے فرنیچر کالج کے قیام کا بھی مطالبہ کیا۔

صوبائی وزیر صنعت و تجارت چوہدری شافع حسین نے اس موقع پر گفتگوکرتے ہوئے کہاکہ فرنیچر انڈسٹری کے مسائل کے حل کیلئے ہر ضروری اقدام کیا جائے گا۔فرنیچر کی نمائشوں کا اہتمام کرنے والے پنڈالوں اور شادی ہالوں کے مالکان کو لیٹربھیجے جائیں گے۔کسی کو بھی مقامی مینو فیکچرز کا استحصال نہیں کرنے دیں گے۔چوہدری شافع حسین نے کہاکہ پاکستان کا بنا ہوا فرنیچر دنیا بھر میں پسند کیا جاتا ہے۔

فرنیچر کی برآمدات بڑھانے کی وسیع گنجائش موجود ہے۔ فرنیچر مینوفیکچررز فرنیچر کے نئے ڈیزائن بھی متعارف کرائیں۔پنجاب کو درپیش تاریخ کے بدترین سیلاب سے فرنیچر انڈسٹری بھی متاثر ہوئی ہے۔پنجاب حکومت سیلاب متاثرین کے نقصانات کے ازالے کیلئے ریلیف پیکج دے گی۔سپیشل سیکرٹری انڈسٹریز نوشین ملک بھی ملاقات میں موجود تھیں۔وفد میں جنرل سیکرٹری پاکستان فرنیچر ایسوسی ایشن عرفان کمبوہ،صدر پنجاب فرنیچر ایسوسی ایشن جعفر حسین،صدرلاہور چیپٹر محمد ریاض مغل اور دیگر شامل تھے۔