سفیر رضوان سعید شیخ کا پاکستان کی ٹیکسٹائل برآمدات کو فروغ دینے کے لیے نیویارک کا دورہ، نتیجہ خیز ملاقاتیں

نیو یارک(اُردو پوائنٹ اخبارتازہ ترین - این این آئی۔ 19 ستمبر2025ء)پاکستان کی جانب سے امریکہ کے ساتھ اقتصادی روابط کو مزید گہرا کرنے کی جاری کوششوں کے تحت، امریکہ میں پاکستان کے سفیر رضوان سعید شیخ، وزیر (تجارت و سرمایہ کاری) محمد حنیف چنا کے ہمراہ، 15 سے 17 ستمبر 2025 تک تین روزہ دورے پر نیویارک گئے۔ اس دورے کا مقصد پاکستانی ٹیکسٹائل برآمدات کو فروغ دینا اور پاکستانی برآمد کنندگان و امریکی مارکیٹ کے درمیان روابط کو مضبوط بنانا تھا۔

اپنے دورے کے دوران، سفیر پاکستان نے متعدد اسٹیک ہولڈرز کے ساتھ نتیجہ خیز ملاقاتیں کیں، جن میں معروف پاکستانی ٹیکسٹائل مینوفیکچررز (گل احمد، الکرم انڈسٹریز، الکرم ٹاولز، نشاط ملز، اور لکی ٹیکسٹائلز)، اہم تجارتی سہولت کار (جیسے کہ TEU اور GSPL-امریکہ)، اور گھریلو ٹیکسٹائل و ملبوسات کے شعبوں میں سرگرم ایجنٹ شامل تھے۔

(جاری ہے)

ملاقاتوں میں پاکستان کی صنعتی صلاحیت، گھریلو ٹیکسٹائل میں اس کے مسابقتی فوائد اور مضبوط تعمیل و ٹریس ایبلٹی ریکارڈ کو استعمال کرتے ہوئے امریکہ کو پاکستان کی برآمدات بڑھانے کے لیے عملی حکمت عملیوں پر تبادلہ خیال کیا گیا۔

عالمی تجارتی صورتحال میں حالیہ تبدیلیوں اور دیگر سپلائرز پر عائد ہونے والے ٹیرف کا ذکر کرتے ہوئے، سفیر پاکستان نے ان ابھرتے ہوئے مواقع کو پاکستان کے ٹیکسٹائل سیکٹر کے لیے پائیدار تجارتی نتائج میں تبدیل کرنے کی اہمیت پر زور دیا۔سفیر پاکستان رضوان سعید شیخ نے سفارتخانے کی فعال تجارتی سفارت کاری پر روشنی ڈالی اور برآمد کنندگان کو واشنگٹن ڈی سی میں پاکستان کے تجارتی و کمرشل ونگ اور نیویارک میں قونصلیٹ جنرل کے مکمل تعاون کا یقین دلایا۔

سفیر پاکستان نے برآمد کنندگان کی حوصلہ افزائی کی کہ وہ ای کامرس اور ڈائریکٹ ٹو کنزیومر پلیٹ فارمز میں تنوع لائیں، اور امریکی ڈیجیٹل ریٹیل میں پاکستانی وینچرز کی کامیابیوں کو ایک مثال کے طور پر پیش کیا۔ برآمد کنندگان نے سفیر پاکستان کو درپیش چیلنجوں، خاص طور پر توانائی کی بڑھتی ہوئی لاگت، سرمائے کی کمی، اور ای کامرس و پائیدار مینوفیکچرنگ اقدامات کے لیے مخصوص خصوصی اقتصادی زونز (SEZs) کی ضرورت سے آگاہ کیا۔

امریکہ میں پاکستانی سفیر کا یہ دورہ ویلیو ایڈڈ برآمدات کو فروغ دینے، امریکہ کے ساتھ دیرپا تجارتی تعلقات قائم کرنے اور خود کو عالمی ٹیکسٹائل سپلائی چین میں ایک قابل اعتماد اور طویل مدتی پارٹنر کے طور پر ثابت کرنے پر پاکستان کی اسٹریٹجک توجہ کی نشاندہی کرتا ہے۔