ترقیاتی کاموں میں کوالٹی اورمیرٹ پر کسی بھی قسم کا سمجھوتہ نہیں ہوگا، علی آمین گنڈاپور

جمعہ 19 ستمبر 2025 20:33

پشاور(اُردو پوائنٹ اخبارتازہ ترین - این این آئی۔ 19 ستمبر2025ء)وزیراعلی خیبرپختونخوا علی آمین گنڈاپور نے کہا ہے کہ ترقیاتی کاموں میں کوالٹی اور میرٹ پر کسی بھی قسم کا سمجھوتہ نہیں ہوگا، ڈپٹی کمشنرز اس سلسلے میں کوئی بھی سیاسی سفارش اور دباؤ کو خاطر میں نہ لائیں۔وزیر اعلیٰ خیبر پختونخوا علی امین گنڈاپور کی زیر صدارت صوبہ بھر کے ڈپٹی کمشنرز کا ویڈیو لنک اجلاس ہوا، چیف سیکرٹری ، ایڈیشنل چیف سیکرٹری پلاننگ اینڈ ڈیولپمنٹ اور دیگر متعلقہ حکام نے اجلاس میں شرکت کی، اجلاس میں تمام اضلاع میں ڈسٹرکٹ ڈیویلپمنٹ پلان کے تحت ترقیاتی منصوبوں سے متعلق معاملات کا جائزہ لیاگیا۔

(جاری ہے)

وزیر اعلیٰ نے ڈی ڈی پی کے تحت ترقیاتی اسکیموں سے متعلق ڈیٹا بمع کوآرڈینیٹس ایک ہفتے میں فراہم کرنے کی ہدایت کی، وزیراعلی نے کہاکہ ڈسٹرکٹ ڈویلپمنٹ کمیٹیز میں منظور ہونے والے ترقیاتی اسکیموں کے جلد سے جلد ٹینڈرز جاری کئے جائیں، ان ترقیاتی منصوبوں پر عملدرآمد کے سلسلے میں غیر ضروری تاخیر سے گریز کیا جائے، ترقیاتی اسکیموں میں سو فیصد شفافیت اور کام کے معیار کو ہر صورت یقینی بنایا جائے، علی امین گنڈاپور کامزید کہنا تھا کہ ترقیاتی کاموں میں کوالٹی اور میرٹ پر کسی بھی قسم کا سمجھوتہ نہیں ہوگا، ڈپٹی کمشنرز اس سلسلے میں کوئی بھی سیاسی سفارش اور دباؤ کو خاطر میں نہ لائیں، ڈپٹی کمشنرز سروس ڈیلیوری کی بہتری اور ترقیاتی منصوبوں کی نگرانی پر خصوصی توجہ دیں، ترقیاتی منصوبوں کے حوالے سے ڈپٹی کمشنرز کو بھر پور اختیارات دئے گئے ہیں اس لئے ان پر ذمہ داریاں بھی عائد ہوتی ہیں، ترقیاتی منصوبوں کے سلسلے میں وسیع تر عوامی مفاد کو پہلی ترجیح دی جائے۔