بلوچستان سمیت پورے ملک کے عوام ظالموں اور ان کے آلہ کاروں کیخلاف متحد ہوجائیں

کوئٹہ ( اردوپوائنٹ اخبار تازہ ترین۔ انٹرنیشنل پریس ایجنسی۔ 19 ستمبر 2025ء ) امیر جماعت اسلامی پاکستان حافظ نعیم الرحمن نے کہا ہے کہ بلوچستان کے نوجوان تعلیم یافتہ اور ہنرمند بن کر آگے بڑھنا چاہتے ہیں، انہیں فوجی آپریشن کی نہیں تعلیم کی ضرورت ہے۔ ایوب سٹیڈیم کوئٹہ میں بنو قابل پروگرام کے شرکا سے خطاب کرتے ہوئے انہوں نے ملک دشمن اور خدانخواستہ اسے توڑنے کی خواہش رکھنے والے عناصر کو واضح پیغام دیا کہ جماعت اسلامی پاکستان کی ہرحال میں حفاظت کرے گی، پاکستان نظریہ کی بنیاد پر معرض وجود میں آیا اور ہم اس نظریہ کے محافظ ہیں۔

الخدمت فاؤنڈیشن پاکستان کے تحت بنوقابل پروگرام کے کوئٹہ میں آغاز پر ہزاروں بچوں اور بچیوں نے مفت آئی ٹی کورسز میں داخلہ کے لیے ٹیسٹ دیا ۔

(جاری ہے)

تقریب سے امیر جماعت اسلامی بلوچستان مولانا ہدایت الرحمن بلوچ اور دیگر قائدین نے بھی خطاب کیا۔ امیر جماعت اسلامی نے بنوقابل کا دائرہ کار صوبہ کے دیگر شہروں تک پھیلانے کا اعلان کیا اور نوجوانوں سے اپیل کی کہ وہ تعمیری سرگرمیوں کا حصہ بن کر ملک و قوم کی خدمت کریں۔

حافظ نعیم الرحمن نے حکمرانوں کو باور کرایا کہ معدنیات کے متنازعہ معاہدوں کی بجائے نوجوانوں کی تعلیم و تربیت اور خصوصی طور پر آئی ٹی اور کمپیوٹر کے شعبہ جات میں ان کی ترقی پر توجہ دی جائے تاکہ آئی ٹی برآمدات میں اضافہ ہو اور خوشحالی آئے۔ ان کا کہنا تھا کہ پاکستان کسی حکمران کی ملکیت نہیں بلکہ پورے ملک کے عوام اس وطن کے مالک ہیں۔

انہوں نے بلوچستان میں امن کے قیام اور عوام کو سہولیات کی فراہمی کا پرزور مطالبہ کرتے ہوئے کہا کہ صوبہ کی محرومیاں دور ہوں گی تو پورا پاکستان ترقی کرے گا۔ حافظ نعیم الرحمن نے کہا کہ عوام پر حکمران مسلط کردیے جاتے ہیں ، بلوچستان اسمبلی میں صرف جماعت اسلامی کے دو ممبران فارم 45 سے آئے ہیں، قوم کو اپنی مرضی سے اپنے نمائندے منتخب کرنے کے مواقع دیے جائیں۔

امیر جماعت اسلامی نے مولانا ہدایت الرحمن کی قیادت میں صوبہ کے حقوق کے لیے ہونے والے حالیہ لانگ مارچ کا تذکرہ کیا اور کہا کہ پنجاب کی عوام نے لانگ مارچ کا بھرپور ساتھ دیا اور ثابت کیا کہ وہ بلوچستان کے ساتھ کھڑے ہیں۔ نومبر میں ہونے والے تاریخی اجتماع عام میں جماعت اسلامی بلوچستان سمیت پورے ملک کی مظلوم عوام کا مقدمہ مینار پاکستان تلے پیش کرے گی۔

حافظ نعیم الرحمن نے بلوچستان کے عوام کو اجتماع میں شرکت کی دعوت دی اور اس عہد کا اعاہ کیا کہ عظیم الشان اجتماع قوم کے حقوق کی جدوجہد کا نقطہ آغاز ہو گا۔ انہوں نے غزہ میں امریکی سرپرستی میں ہونے والے صہیونی مظالم کا ذکر کیا اور کہا کہ ظالم استعماری طاقتیں اکٹھی ہوکر فلسطینیوں کو نشانہ بنا رہی ہیں، بلوچستان سمیت پورے ملک کے عوام ظالموں اور ان کے آلہ کاروں کے خلاف متحد ہوجائیں۔

مولانا ہدایت الرحمن نے کہا کہ بلوچستان میں معدنیات سے زیادہ قیمتی یہاں کے نوجوان ہیں، صوبہ کے نوجوان سمندر کی سی صلاحیتوں سے مالا مال ہیں۔بلوچستان کے عوام بالخصوص نوجوان مایوس نہیں ہیں ، انہیں مخلص قیادت اور سرپرستی کی ضرورت ہے ،جماعت اسلامی اور الخدمت فاونڈیشن صوبہ کے نوجوانوں کو مواقع دےگی۔