ڈی جی سیف سٹی اور چیف ٹریفک آفیسر نے محکمانہ ترقی پانے والے اسلام آباد ٹریفک پولیس کے افسران کو رینک لگائے

منگل 23 ستمبر 2025 19:50

اسلام آباد (اُردو پوائنٹ اخبارتازہ ترین - اے پی پی۔ 23 ستمبر2025ء) ڈی جی سیف سٹی محمد ہارون جوئیہ اور چیف ٹریفک آفیسر حمزہ ہمایوں اور دیگر افسران نے محکمانہ ترقی پانے والے اسلام آباد ٹریفک پولیس کے افسران کو رینک لگائے ،مبارکباد پیش کی اور ان کے لئے نیک خواہشات کا اظہار کیا۔پولیس ترجمان کے مطابق اسلام آباد ٹریفک پولیس ہیڈکوارٹرزفیض آباد میں اگلے عہدوں پر ترقی پانے والے پولیس افسران کے اعزاز میں پروقار تقریب کا انعقاد کیا گیا۔

تقریب میں ڈی جی سیف سٹی/ڈی آئی جی ہیڈ کوارٹرز محمد ہارون جوئیہ اور چیف ٹریفک آفیسر اسلام آباد کیپٹن (ر)حمزہ ہمایوں نے سینئر افسران کے ہمراہ ہیڈ کانسٹیبل سے اسسٹنٹ سب انسپکٹر کے عہدے پر محکمانہ ترقی پانے والے پولیس افسران کو رینک لگائے۔

(جاری ہے)

انہوں نے تمام ترقی یاب ہونے والے پولیس افسران کو مبارکباد دی اور ان کے لئے نیک دلی خواہشات کا اظہار کیا۔

اس موقع پر ڈی جی سیف سٹی محمد ہارون جوئیہ نے ترقی پانے والے پولیس افسران سے خطاب کرتے ہوئے کہا کہ اب آپ سب کے کاندھوں پر ذمہ داریاں بڑھ گئی ہیں ، آئی جی اسلام آباد سید علی ناصر رضوی نے واضح احکامات جاری کئے ہیں کہ تمام خالی پوسٹوں پر ترقیوں کا سلسلہ جاری رکھا جائے ،یہ آپ کی محنت اور کاوشوں کے صلہ ہے کہ اللہ تعالی نے آپ کو اس مقام پرپہنچایا ہے اب آپ کو پہلے سے زیادہ ذمہ داریاں سونپی گئی ہیں،آپ ان عہدوں پر اپنے فرائض منصبی احسن طریقے سے سرانجام دیتے ہوئے اپنے محکمہ کی نیک نامی کا باعث بنیں اور محکمہ پولیس کی ویلفیئر، شہریوں کوانصاف کی فراہمی کو اپنااولین شعار بناتے ہوئے آسانیاں پیدا کرنے کا باعث بنیں۔

انہوں نے مزید کہا کہ میں امید کرتا ہوں کہ آپ ہمیشہ کی طرح خوش اخلاقی، دلجمعی، نیک نیتی اور شہریوں کی مدد کے جذبے سے سرشار ہو کر فرائض منصبی سرانجام دیں گے۔ اس موقع پر ترقی پانے والے افسران نے نیک خواہشات اور عزت افزائی پر سینئر افسران کا شکریہ ادا کیا اور اس بات کا عہد کیا کہ وہ اپنی ذمہ داریاں پیشہ وارانہ انداز میں سرانجام دیتے ہوئے محکمے کی نیک نامی کا باعث بنیں گے۔