امریکا کے شہر ڈیلس میں فائرنگ سے حملہ آور سمیت 3افراد ہلاک، ایک زخمی

جمعرات 25 ستمبر 2025 17:08

نیویارک(اُردو پوائنٹ اخبارتازہ ترین - این این آئی۔ 25 ستمبر2025ء)امریکہ کی ریاست ٹیکساس کے شہر ڈیلس میں امریکی امیگریشن اینڈ کسٹمز انفورسمنٹ کے حراستی مرکز پر سنائپر حملے سے زیر حراست دو افراد ہلاک جبکہ ایک زخمی ہو گیا۔غیرملکی خبررساں ادارے کی رپور ٹ کے مطابق محکمہ پولیس ڈیلس نے ایکس پر ایک پوسٹ میں بتایا کہ مشتبہ مسلح شخص نے متصل عمارت سے آئی سی ای کے حراستی مرکز پر بلااشتعال فائرنگ کی تھی، ہلاک ہو گیا ہے۔

ہوم لینڈ سکیورٹی کی سیکرٹر ی کرسٹی نوم نے بتایا کہ حملہ آور اپنی ہی گولی لگنے سے مارا گیا۔کرسٹی نوم نے سوشل میڈیا پلیٹ فارم ایکس پر لکھا کہ اگرچہ ہمیں تاحال فائرنگ کرنے کی وجہ معلوم نہیں ہو سکی، لیکن ہم جانتے ہیں کہ ہمارے قانون نافذ کرنے والے اداروں کو بے پناہ تشدد کا سامنا ہے، اسے رکنا چاہیے۔

(جاری ہے)

ایف بی آئی کے حکام نے کہاکہ ایسا معلوم ہوتا ہے کہ اس نے براہِ راست میگریشن اینڈ کسٹمز انفورسمنٹ کو نشانہ بنایا۔

یہ ایجنسی لاکھوں غیرقانونی تارکین وطن کو ملک سے نکالنے کے صدر ڈونلڈ ٹرمپ کے وعدے کو پورا کرنے کی بنیادی طور پر ذمہ دار ہے۔امریکی میڈیا کی رپورٹس کے مطابق یہ واقعہ ایک فیلڈ آفس میں پیش آیا جہاں حراستی مرکز میں منتقل کرنے سے قبل گرفتار کیے گئے غیرقانونی تارکین کی بے دخلی کی کارروائی اور ضروری دستاویزات مکمل کی جاتی ہیں۔امریکی میڈیا نے کہا کہ جس وقت فائرنگ کا یہ واقعہ پیش آیا اس وقت تارکین کو ملک بدری سے قبل ضروری کارروائی کے لیے دفتر کے اندر جایا جا رہا تھا۔