برطانوی اداکارہ کاغزہ میں اسرائیلی جارحیت پر تشویش کا اظہار

غزہ میں معصوم بچوں سمیت ہزاروں لوگوں کے قتل پر ہر ایک کو تشویش ہونی چاہیے، ایما واٹسن

ہفتہ 27 ستمبر 2025 10:35

لندن(اُردو پوائنٹ اخبارتازہ ترین - این این آئی۔ 27 ستمبر2025ء) برطانیہ کی عالمی شہرت یافتہ اداکارہ ایما واٹسن نے غزہ میں اسرائیلی جارحیت پر تشویش کا اظہار کرتے ہوئے شدید الفاظ میں مذمت کی ہے۔فلم کی جادوئی دنیا کی ہرمیون گرینجر یعنی ایما واٹسن ایک بار پھر دنیا کی توجہ کا مرکز بن گئیں، مگر اس بار بات کسی فلم، فیشن یا ایوارڈ کی نہیں بلکہ فلسطین کے حوالے سے ان کے موقف کی ہے۔

ایما نے ایک پوڈکاسٹ میں کھل کر بتایا کہ جب انہوں نے 2022میں فلسطینی عوام کے ساتھ اظہار یکجہتی کیا تھا تو انہیں یہود دشمن قرار دیا گیا تھا۔اداکارہ ایما راٹسن نے کہا کہ اس وقت وہ حیران رہ گئیں کہ انسانیت کی بات کرنے پر انہیں نفرت سے جوڑا گیا۔ایما واٹسن نے کہا کہ مجھے یہودی مخالف کہہ کر دراصل لوگوں کو اس طرف مائل کیا گیا کہ وہ دہشت گردی کی مذمت نہ کریں اور فلسطین میں جاری نسل کشی پر بات نہ کریں۔

(جاری ہے)

اداکارہ نے زور دے کر کہا کہ 50ہزار فلسطینی شہری جان سے گئے، جن میں 17ہزار بچے بھی شامل ہیں، یہ پوری دنیا کے لیے تشویش کا باعث ہونا چاہیے۔انہوںنے کہاکہ اسی طرح حماس کے حملوں میں ہلاک ہونے والے اسرائیلی شہریوں کے لیے بھی فکر کی گنجائش ہونی چاہیے۔ایما واٹسن نے کہاکہ یہود دشمنی اور فلسطینی نسل کشی کے خلاف آواز اٹھانا دو الگ باتیں ہیں، اور انسانیت کا تقاضا ہے کہ دونوں پر کھل کر بات کی جائے۔