ًفیصل آباد میں یومیہ 63 ملین گیلن کے ویسٹ واٹر ٹریٹمنٹ کے دو بڑے منصوبوں پر اہم پیشرفت

ویسٹ واٹر اور سرفیس واٹر ٹریٹمنٹ پلانٹس سے پینے کے صاف پانی اور زرعی استعمال میں نمایاں بہتری ہوگی ةسیکرٹری ہاؤسنگ کی زیر صدارت اجلاس ، منصوبے عالمی اداروں کے تعاون سے بروقت مکمل کرنے کی ہدایت

پیر 29 ستمبر 2025 19:45

لاہور (اُردو پوائنٹ اخبارتازہ ترین - آن لائن۔ 29 ستمبر2025ء) وزیر اعلیٰ پنجاب مریم نواز شریف کی خصوصی ہدایت پر فیصل آباد میں ویسٹ واٹر ٹریٹمنٹ اور سرفیس واٹر ٹریٹمنٹ کے دو بڑے منصوبوں پر پیشرفت تیز کر دی گئی ہے۔ اس حوالے سے سیکرٹری ہاؤسنگ نورالامین مینگل کی زیر صدارت اجلاس منعقد ہوا جس میں ڈی جی واسا پنجاب طیب فرید نے بریفنگ دی۔ ترجمان محکمہ ہاؤسنگ کے مطابق فیصل آباد میں ایسٹرن ویسٹ واٹر ٹریٹمنٹ پلانٹ کے فیز 1 پر کام کا آغاز کیا جا رہا ہے۔

(جاری ہے)

یہ پلانٹ ڈنمارک کی کمپنی نراس کے تعاون سے تعمیر ہوگا اور اگست 2028 تک مکمل کر لیا جائے گا۔ اس پلانٹ کے ذریعے روزانہ 33 ملین گیلن گندے پانی کو صاف کر کے زرعی مقاصد کے لیے استعمال کیا جا سکے گا۔ یومیہ 30 ملین گیلن صلاحیت کے سرفیس واٹر ٹریٹمنٹ پلانٹ پر بھی کام جاری ہے جو اے ایف ڈی فرانس کے تعاون سے ستمبر 2027 تک مکمل ہوگا۔ یہ منصوبہ فیصل آباد میں پینے کے پانی کی ڈیمانڈ اینڈ سپلائی کے مسائل کے حل میں اہم کردار ادا کرے گا۔ ترجمان کے مطابق ان منصوبوں سے فیصل آباد کی مشرقی آبادی کو صاف پانی کی فراہمی ممکن ہو گی اور آبی وسائل میں اضافہ ہوگا۔ وزیر اعلیٰ پنجاب کی ہدایت کے مطابق ان منصوبوں کو بروقت مکمل کرنے کے لیے اقدامات جاری ہیں