وزیراعلی پنجاب مریم نوازشریف کی ہدایت پر ضلعی انتظامیہ ننکانہ صاحب سموگ کے خاتمے کے لیے متحرک

منگل 30 ستمبر 2025 12:57

ننکانہ صاحب(اُردو پوائنٹ اخبارتازہ ترین - این این آئی۔ 30 ستمبر2025ء) وزیراعلی پنجاب مریم نواز شریف کی ہدایت پر ضلعی انتظامیہ ننکانہ صاحب سموگ کے خاتمے کے لیے متحرک۔ تفصیلات کے مطابق ضلعی انتظامیہ ننکانہ صاحب کے زیر اہتمام انسداد سموگ آگاہی واک کا انعقاد کیا گیا۔ڈپٹی کمشنر ننکانہ صاحب محمد تسلیم اختر راو نے آگاہی واک کی قیادت کی ، آگاہی واک میں ایڈیشنل ڈپٹی کمشنرز ، اسسٹنٹ کمشنر ، ڈپٹی ڈائریکٹر ماحولیات سمیت دیگر افسران نے شرکت کی ، سول سوسائٹی، میڈیا نمائندگان ، سکھ کمیونٹی سمیت شہریوں کی بڑی تعداد آگاہی ریلی میں موجود تھی۔

انسداد سموگ آگاہی ریلی ڈی سی آفس سے گوردوارہ جنم استھان تک نکالی گئی۔اس موقع پر ڈپٹی کمشنر محمد تسلیم اختر راو نے ریلی کے شرکاسے خطاب کرتے ہوئے کہا کہ یہ انسداد سموگ کی آگاہی کا آغاز ہے ، ذرائع ابلاغ کے ذریعے ہر شہری تک آگاہی پہنچے گی۔

(جاری ہے)

شہری و انتظامیہ ملکر ہی سموگ میں کمی لا سکتے ہیں ، دونوں کی ذمہ داریاں یکساں ہیں۔انہوں نے کہا کہ انسداد سموگ کے خاتمے کے لیے کوڑے کو آگ نہ لگائی جائے ، شہری شکایات و اطلاعات دیں ، فوری ایکشن ہو گا ، دھواں چھوڑنے اور بغیر فٹنس گاڑیوں پر کریک ڈاون کیا جائیگا۔

ڈپٹی کمشنر نے کہا کہ فصلوں کی باقیات جلانے والوں پر بھی سخت ایکشن ہو گا۔ماحول کو صاف رکھنے کے لیے ماحولیات سکواڈز ، پیرا فورس و دیگر ادارے مکمل طور پر ایکشن میں نظر آئے گئے۔