شجاع آباد ،دو نومولود بہنیں زہریلی چیز پلائے جانے سے جاں بحق،تیزاب سے قتل کئے جانے کا خدشہ

بدھ 1 اکتوبر 2025 05:15

ملتان (اُردو پوائنٹ اخبارتازہ ترین - این این آئی۔ 01 اکتوبر2025ء)شجاع آباد میں زہریلی چیز پلائے جانے سے ایک ماہ کی 2نومولود بہنیں نور فاطمہ اور ایمان فاطمہ جاں بحق ہو گئیں۔ تفصیلات کے مطابق دونوں بچیاں 30 اگست کو آپریشن کے ذریعے پیدا ہوئی تھیں۔ والدین کے مطابق نور فاطمہ پیدائش کے محض 13 دن بعد انتقال کر گئی جبکہ ایمان فاطمہ کی طبیعت بگڑنے پر اسے فوری طور پر ہسپتال منتقل کیا گیا جہاں وہ جانبر نہ ہو سکی۔

(جاری ہے)

ایمان فاطمہ کا پوسٹ مارٹم سول ہسپتال شجاع آباد میں مکمل کر لیا گیا ہے جبکہ پولیس اور میڈیکل ذرائع کے مطابق زہریلی یا تیزابی چیز پلانے کا شبہ ہے۔واقعے کی مکمل تحقیقات کے لیے فرانزک رپورٹس کا انتظار کیا جا رہا ہے۔پولیس نے والد عاقب خان کی مدعیت میں نامعلوم ملزمان کے خلاف ایمان فاطمہ کے قتل کا مقدمہ درج کر لیا ہے جبکہ نور فاطمہ کی موت کی بھی الگ سے تفتیش کی جائے گی۔پولیس کے مطابق اندوہناک جرم گھریلو رنجش یا ذاتی دشمنی کا نتیجہ ہو سکتا ہے تاہم حتمی رائے پوسٹ مارٹم اور فرانزک رپورٹس آنے کے بعد ہی دی جائے گی۔