ایلون مسک کی دولت 500 ارب ڈالر سے تجاوز کر گئی، فوربز رپورٹ

جمعرات 2 اکتوبر 2025 08:30

نیویارک (اُردو پوائنٹ اخبارتازہ ترین - اے پی پی۔ 02 اکتوبر2025ء) معروف امریکی تاجر ایلون مسک دنیا کے پہلے شخص بن گئے ہیں جن کی ذاتی دولت 500 ارب ڈالر سے تجاوز کر گئی ہے۔امریکی کاروباری جریدے فوربز نے رپورٹ کیا ہے کہ ایلون مسک کی دولت 500 ارب ڈالر کی حد کو عبور کر گئی، اور کل شام تک یہ رقم 500.5 ارب ڈالر تک جا پہنچی۔ ایلون مسک اس وقت ٹیسلا، اسپیس ایکس، ایکس (سابقہ ٹوئٹر) اور نیورلِنک جیسی بڑی کمپنیوں کے مالک ہیں۔

(جاری ہے)

فوربز کا کہنا ہے کہ ایلون مسک کی دولت میں اس تیز رفتار اضافے کی ایک اہم وجہ ان کا حکومتی ادارے سے استعفیٰ دے کر مکمل توجہ کاروبار پر مرکوز کرنا ہے۔ارب پتیوں کی فہرست میں اس وقت مسک سرِفہرست ہیں۔ ان کے بعد لیری ایلیسن 351.6 ارب ڈالر، مارک زکربرگ 246.1 ارب ڈالر، جیف بیزوس 233.2 ارب ڈالر اور لیری پیج 204.6 ارب ڈالر کے ساتھ موجود ہیں۔خیال رہے کہ اس سے قبل ایلون مسک نے دسمبر 2024 میں 400 ارب ڈالر کی دولت حاصل کرنے والے پہلے شخص ہونے کا اعزاز بھی اپنے نام کیا تھا۔