پہلی ششماہی میں عمرہ زائرین کی تعداد 38 لاکھ رہی ،ان میں 28 لاکھ بیرونی زائرین کا تعلق 138 ممالک سے تھا،سعودی حکام

ہفتہ 4 اکتوبر 2025 09:50

مکہ مکرمہ (اُردو پوائنٹ اخبارتازہ ترین - اے پی پی۔ 04 اکتوبر2025ء) سعودی عرب کی وزارت حج و عمرہ نے کہا ہے کہ رواں برس پہلی ششماہی کے دوران عمرہ زائرین کی تعداد 38 لاکھ سے زیادہ رہی جو سالانہ بنیاد پر 6 فیصد زیادہ ہے،ان میں 28 لاکھ بیرونی زائرین کا تعلق 138 ممالک سے تھا۔عاجل نیوز نے وزارت حج و عمرہ کے حوالے سے بتایا کہ رواں برس عمرہ سیزن کے آغاز سے گزشتہ ماہ کے اختتام تک اندرونی وبیرونی عمرہ زائرین کی تعداد 38 لاکھ سے تجاوز کر گئی ۔

(جاری ہے)

بیرون ملک سے عمرہ ویزے پر 28 لاکھ زائرین مملکت پہنچے جن کا تعلق 135 ممالک سے تھا ،انہوں نے عمرہ کی ادائیگی کے بعد مسجد نبوی الشریف میں بھی حاضری دی۔وزارتِ حج و عمرہ کا کہنا ہے کہ عمرہ زائرین کو بہترین خدمات کی فراہمی یقینی بنانے کے لیے تفتیشی ٹیمیں مقرر کی گئی ہیں جو عمرہ سروسز فراہم کرنے والی کمپنیوں کی نگرانی کرتی ہیں۔علاوہ ازیں زائرین کی سہولت اور کسی بھی شکایت کے ازالے کے لیے مکہ مکرمہ اور مدینہ منورہ میں ذیلی دفاتر اور حرمین شریفین کے باہر کیبنزمیں بھی اہلکار تعینات کیے جاتے ہیں۔