Live Updates

سیکرٹری زراعت پنجاب کی زیر صدارت اجلاس،سیلاب متاثرہ آم کے باغات کی صورتحال کا جائزہ لیا

اتوار 5 اکتوبر 2025 20:20

لاہور (اُردو پوائنٹ اخبارتازہ ترین - اے پی پی۔ 05 اکتوبر2025ء) سیکرٹری زراعت پنجاب افتخار علی سہو کی زیر صدارت اہم جائزہ اجلاس منعقد ہوا ، اس دوران ملتان میں سیلاب سے متاثرہ آم کے باغات کی صورتحال کا تفصیلی جائزہ لیا گیا۔اس موقع پر سیکرٹری زراعت پنجاب نے ہدایت کی کہ سیلاب سے متاثرہ آم کے باغات کا سروے کیا جائے، مینگو ریسرچ انسٹیٹیوٹ اور محکمہ زراعت توسیع کے متعلقہ افسران کو نقصان کے سروے کا ٹاسک سونپ دیا گیا ہے۔

سیکرٹری زراعت نے مزید ہدایت دیتے ہوئے کہا کہ سروے کے دوران آم کے متاثرہ پودوں کی صحت بارے ایڈوائزری بھی جاری کی جائے تاکہ باغات کی بحالی ممکن ہو سکے۔ انہوں نے کہا کہ سیلاب کی وجہ سے کبیروالا، ملتان، جلال پور پیر والا اور علی پور میں آم کے باغات بری طرح متاثر ہوئے ہیں، پاکستانی آم کی ملکی و غیر ملکی منڈیوں میں بڑی مانگ اور آم کی کوالٹی و پیداوار میں اضافہ کے لیے ٹھوس عملی اقدامات اٹھائے جا رہے ہیں۔

(جاری ہے)

انہوں نے مزید بتایا کہ 75 کروڑ روپے کی لاگت سے آم کی پیداوار میں اضافہ کے پروگرام پر عملدرآمد جاری ہے۔اجلاس میں سپیشل سیکرٹری زراعت جنوبی پنجاب سرفراز حسین مگسی، وائس چانسلر ایم این ایس زرعی یونیورسٹی ملتان پروفیسر ڈاکٹر آصف علی، ڈائریکٹر جنرلز محکمہ زراعت پنجاب چوہدری عبدالحمید، نوید عصمت کاہلوں، ڈاکٹر عامر رسول، کنسلٹنٹ محکمہ زراعت ڈاکٹر محمد انجم علی سمیت مینگو گروورز نے شرکت کی۔