کراچی میں دو الگ الگ پولیس مقابلے، 3 زخمیوں سمیت 4 ملزمان گرفتار

زخمی ملزمان کو طبی امداد کے لیے اسپتال منتقل کر دیا گیا، پولیس‘دونوں واقعات میں اسلحہ اور موٹر سائیکل برآمد

منگل 7 اکتوبر 2025 15:05

کراچی(اُردو پوائنٹ اخبارتازہ ترین - این این آئی۔ 07 اکتوبر2025ء) شہر قائد میں پولیس اور جرائم پیشہ عناصر کے درمیان دو مختلف مقامات پر مبینہ پولیس مقابلے ہوئے جن کے دوران فائرنگ کے تبادلے میں تین زخمی ملزمان سمیت چار ملزمان کو گرفتار کر لیا گیا۔پولیس نے دونوں واقعات میں اسلحہ اور موٹر سائیکل برآمد کرنے کا دعویٰ بھی کیا ہے۔پہلا مقابلہ پاک کالونی تھانے کی حدود میں میوہ شاہ کے ایم سی کٹ کے قریب پیش آیا، جہاں پولیس نے گشت کے دوران مشکوک موٹر سائیکل سواروں کو رکنے کا اشارہ کیا۔

پولیس کے مطابق ملزمان نے رکنے کے بجائے فائرنگ شروع کر دی، جس کے جواب میں پولیس نے بھی جوابی فائرنگ کی۔فائرنگ کے تبادلے کے بعد دو ملزمان ریحان عرف گنجا اور ریاض عرف چاچو زخمی حالت میں گرفتار کر لیے گئے۔

(جاری ہے)

پولیس نے دعویٰ کیا ہے کہ ان کے قبضے سے دو پستول اور ایک موٹر سائیکل برآمد ہوئی ہے۔زخمی ملزمان کو فوری طبی امداد کے لیے اسپتال منتقل کر دیا گیا۔

دوسرا مبینہ پولیس مقابلہ کورنگی بھٹائی چوکی کے قریب پیش آیا، جہاں بھی مشتبہ افراد کی جانب سے پولیس پر فائرنگ کی گئی۔جوابی کارروائی میں ایک ملزم زخمی ہوا جبکہ دوسرے کو حراست میں لے لیا گیا۔پولیس کا کہنا ہے کہ گرفتار ملزمان کے قبضے سے ایک موٹر سائیکل اور اسلحہ برآمد ہوا ہے، جبکہ زخمی ملزم کو طبی امداد کے لیے اسپتال منتقل کر دیا گیا ہے اور دوسرے ملزم سے تفتیش جاری ہے۔