پشاور گندم سکینڈل میں اہم پیشرفت، 5 ملزمان پر فرد جرم عائد

بدھ 8 اکتوبر 2025 19:50

پشاور (اُردو پوائنٹ اخبارتازہ ترین - اے پی پی۔ 08 اکتوبر2025ء) خیبرپختونخوا میں 1700 ٹن گندم غائب ہونے کے بڑے سکینڈل میں اہم پیش رفت سامنے آئی ہے، اینٹی کرپشن عدالت نے مقدمے میں نامزد 5 ملزمان پر فردِ جرم عائدکردی ہے۔کیس کی سماعت اینٹی کرپشن کورٹ خیبر پختونخوا کے جج آصف رشید نے کی، جس میں ملزمان محمد ارشد، محمد خالد، قاضی جنید، طلاء محمد اور محمد عاطف عدالت میں پیش ہوئے۔

(جاری ہے)

پراسیکیوشن کے مطابق ملزمان کا تعلق اضاخیل نوشہرہ کے گندم اسٹوریج گودام سے ہے، جہاں انہوں نے ملی بھگت سے 1700 ٹن گندم غائب کی، جس کے نتیجے میں قومی خزانے کو 20 کروڑ روپے سے زائد کا نقصان پہنچا،روپوش ملزم کی تلاش جاری ہے،پراسیکیوشن نے عدالت کو مزید بتایا کہ ایک اور ملزم عثمان عابد شاہ تاحال روپوش ہے جس کی گرفتاری کیلئے کوششیں جاری ہیں۔تحقیقات مکمل ہونے کے بعد کیس کا چالان عدالت میں جمع کرا دیا گیا، جس پر عدالت نے 5 ملزمان پر باضابطہ فرد جرم عائد کر دی۔آئندہ سماعت پر گواہوں کو طلب کر لیا گیا ہے، سماعت 20 اکتوبر تک کیلئے ملتوی کر دی گئی۔