نادرا کی پاک آئی ڈی ایپ، شناختی کارڈ کے حصول کیلئے دفاتر جانے کی ضرورت ختم

جمعرات 9 اکتوبر 2025 20:45

اسلام آباد (اُردو پوائنٹ اخبارتازہ ترین - این این آئی۔ 09 اکتوبر2025ء) نادرا کی پاک آئی ڈی موبائل ایپلی کیشن نے پاکستانی شہریوں کے لیے شناختی دستاویز کے حصول کا طریقہ کار ہی بدل کر رکھ دیا۔ترجمان نادرا سید شباہت علی نے نجی ٹی وی سے گفتگو کرتے ہوئے کہا کہ نادرا کی پاک آئی ڈی موبائل ایپ پاکستانی شہریوں کے لیے ایک بڑی سہولت بن گئی ہے۔ شہری گھر بیٹھے درخواستیں دینے لگے۔

تین ماہ کے دوران 12 لاکھ سے زائد درخواستیں موصول ہوگئی۔

(جاری ہے)

سید شباہت علی نے کہا کہ پاک آئی ڈی ایپ ایک کروڑ سے زائد لوگ ڈان لوڈ کر چکے ہیں، پاک آئی ڈی انتہائی قابل اعتماد عوامی سروس ایپلی کیشنز میں شمار ہو چکی۔ترجمان نادرا نے کہا کہ شہری اپنے سمارٹ فون کے ذریعے شناختی دستاویزات کی درخواست دیتے ہیں، پاک آئی ڈی ایپ میں شہریوں کیلئے درخواست کی براہ راست ٹریکنگ کی بھی سہولت موجود ہے۔پاک آئی پی ایپ کے باعث نادرا کو ڈیجیٹل درخواستوں کی وصولی میں 45فیصد اضافہ ہوگیا۔ ترجمان نادرا کے مطابق روزانہ اوسطا 10ہزار سے زیادہ کیسز ایپ کے ذریعے نمٹائے جا رہے ہیں۔