انڈر20فٹ بال ورلڈکپ،امریکا اور مراکش کی ٹیمیں کوارٹر فائنل میں پہنچ گئیں

جمعہ 10 اکتوبر 2025 12:55

سانتیاگو (اُردو پوائنٹ اخبارتازہ ترین - اے پی پی۔ 10 اکتوبر2025ء) امریکا اور مراکش کی ٹیمیں فیفا کے زیر اہتمام چلی میں جاری 24 ویں انڈر 20ورلڈ کپ فٹ بال ٹورنامنٹ کے کوارٹر فائنل رائونڈ میں پہنچ گئیں جبکہ اٹلی اور جنوبی کوریا کی ٹیمیں پری کوارٹر فائنل رائونڈ میں ہار کر میگا ایونٹ سے باہر ہوگئی ہیں۔سپورٹس ویب سائٹ کے مطابق انڈر 20فٹ بال ورلڈ کپ کے چلی میں سجے عالمی میلے میں شائقین فٹ بال کو انتہائی دلچسپ اور کانٹے دار مقابلے دیکھنے کو مل رہے ہیں۔

میگا فٹ بال ٹورنامنٹ اپنے اختتامی مرحلے کی طرف گامزن ہے ۔میگا ایونٹ کے ٹاپ 16 رائونڈ کے میچ میں امریکا اور اٹلی کی ٹیمیں آمنے سامنے تھیں یہ میچ سٹیڈیو ای ایل ٹینینٹ، رانکاگوا میں کھیلا گیا جس میں امریکا کی ٹیم نے انتہائی شاندار کھیل پیش کرتے ہوئے حریف اٹلی کی ٹیم کو 0-3گول سے ہرا کر کوارٹر فائنل کے لئے کوالیفائی کرلیا۔

(جاری ہے)

امریکا کی طرف سے بینجمن کریماسچی نے 2 جبکہ نیکو ساکیرس ایک سکور کر کے اپنی ٹیم کی فتح میں اہم کردار ادا کیا۔

میچ میں اٹلی کی ٹیم کوئی گول سکور نہ کر سکی۔سٹیڈیو ای ایل ٹینینٹ، رانکاگوا میں ہی کھیلے گئے میگا ایونٹ کے آخری ٹاپ 16 میچ میں مراکش اور جنوبی کوریا کی ٹیموں کے درمیان انتہائی سخت مقابلہ ہوا جس میں مراکش کی ٹیم نے جنوبی کوریا کی ٹیم کو ایک کے مقابلے میں 2 گول سے ہرا دیا۔مراکش کی فتح میں شن من ہا اور او جی یاسر زبیری نے ایک،ایک گول کر کے اہم کردار ادا کیا۔

شن من ہانے میچ کے 8 ویں منٹ میں سکور کیا جبکہ یاسر زبیری نے 58 ویں منٹ میں دوسرا گول سکور کیا۔جنوبی کوریا کی جانب سے واحد گول کم تائی وان نے میچ کے آخری لمحات میں سکور کیا۔یوں مراکش نے جنوبی کوریا کو 1-2 سے شکست دے کر میگا ایونٹ کے ٹاپ 8 رائونڈ کے لئے کوالیفائی کرلیا۔میگا ایونٹ کے چاروں کوارٹر فائنلز11 اور 12ا کتوبر کو کھیلے جائیں گے ، اس کے بعد میگا ایونٹ کے دونوں سیمی فائنلز15 اکتوبر کو کھیلے جائیں گے جبکہ تیسری پوزیشن کے لئے میچ 18 جبکہ فائنل میچ 19 اکتوبر کو جولیو مارٹینیز پرادانوس نیشنل سٹیڈیم، سانتیاگومیں کھیلا جائے گا۔