فلپائن میں 7.4 شدت کا ہولناک زلزلہ، سونامی کا الرٹ جاری

بحرالکاہل کے ساحلی علاقوں میں ایک میٹر اونچی لہروں کی پیش گوئی ،لوگوں میں خوف وہراس

جمعہ 10 اکتوبر 2025 13:55

منیلا(اُردو پوائنٹ اخبارتازہ ترین - این این آئی۔ 10 اکتوبر2025ء) فلپائن میں زلزلے کے شدید جھٹکے محسوس کیے گئے جس کے بعد سونامی کی وارننگ جاری کر دی گئی۔غیرملکی خبر ایجنسی کے مطابق جنوبی فلپائن کے جزیرے مِنڈانا کے مشرقی ساحل پر 7.4 شدت کے زلزلے نے پورے علاقے کو ہلا کر رکھ دیا۔امریکی جیولوجیکل سروے کے مطابق زلزلہ مقامی وقت کے مطابق صبح 9 بج کر 43 منٹ پر آیا اور اس کا مرکز ڈوا اوریئنٹل صوبے کے سینٹیاگو شہر سے تقریبا 20 کلو میٹر مشرق میں واقع تھا۔

(جاری ہے)

فلپائن کے زلزلہ پیما ادارے کے مطابق بحرالکاہل کے ساحلی علاقوں میں ایک میٹر اونچی لہروں کی پیش گوئی کی گئی ہے۔ زلزلہ جنوبی علاقے مانائے کے قریب سمندر میں آیا جس کی گہرائی 10 کلو میٹر ریکارڈ کی گئی، تاحال کسی قسم کی جانی ومالی نقصان کی تصدیق نہیں ہوئی ہے۔ فلپائن میں ساحلی علاقے میں رہنے والوں کو محفوظ مقام پر منتقل ہونے کی ہدایات جاری کی گئی ہیں۔دوسری جانب فلپنس انسٹیٹیوٹ آف وولکینولوجی اینڈ سیسمولوجی نے سونامی کی وارننگ جاری کر دی ۔