محسن نقوی سے تبلیغی جماعت کے وفد کی ملاقات، سالانہ اجتماع کی تیاریوں پر تبادلہ خیال

اجتماع کے انعقاد میں ہر ممکن تعاون فراہم کیا جائے گا،وزیر داخلہ کی تبلیغی جماعت کے اکابرین کویقین دہانی

ہفتہ 11 اکتوبر 2025 10:45

لاہور(اُردو پوائنٹ اخبارتازہ ترین - این این آئی۔ 11 اکتوبر2025ء) وفاقی وزیر داخلہ محسن نقوی سے تبلیغی جماعت کے وفد نے ملاقات کر کے نومبر میں ہونے والے سالانہ تبلیغی اجتماع کی تیاریوں سے آگاہ کیا۔ وفاقی وزیر داخلہ محسن نقوی سے ملاقات کرنے والے وفد میں انوار غنی، اقبال میاں، محمد عامر اور زاہد پراچہ شامل تھے، وزیر مملکت برائے داخلہ طلال چوہدری اور دیگر بھی موجود تھے۔

(جاری ہے)

محسن نقوی نے کہا کہ اجتماع کے انعقاد میں وزارت داخلہ کی جانب سے ہر ممکن تعاون فراہم کیا جائے گا، اجتماع میں شرکت کیلئے آنے والے غیر ملکی وفود کو ویزا کے حصول میں مکمل سہولت فراہم کی جائے گی۔ انہوں نے کہا کہ گزشتہ سال کی طرح اس سال بھی ہوائی اڈوں پر خصوصی کائونٹر قائم کیے جائیں گے، اسلام کی تبلیغ کیلئے سہولت اور آسانی فراہم کرنا ہمارا فرض ہے اور ثواب کا کام ہے۔تبلیغی جماعت کی جانب سے بتایا گیا کہ پچھلے سال 108 ممالک سے لگ بھگ 15 ہزار سے زائد بین الاقوامی شرکا سالانہ اجتماع میں شریک ہوئے تھے۔اس موقع پر سیلاب زدگان اور ملکی ترقی و سلامتی کیلئے خصوصی دعا بھی کی گئی۔