فوڈ اتھارٹی مظفرآباد کی کارروائی، ایس او پیز کی خلاف ورزی پر والز آئسکریم کا وئیر ہاؤس سیل

ہفتہ 11 اکتوبر 2025 19:54

مظفرآباد (اُردو پوائنٹ اخبارتازہ ترین - اے پی پی۔ 11 اکتوبر2025ء) فوڈ اتھارٹی مظفرآباد نے کارروائی کرتے ہوئے ایس او پیز کی خلاف ورزی پر مشہور آئسکریم کمپنی والز آئسکریم کا وئیر ہاؤس سیل کر دیا۔تفصیلات کے مطابق اسسٹنٹ فوڈ سیفٹی آفیسر قاضی شفیق الرحمن نے ہمراہ ٹیم شہر کے مختلف آئسکریم وئیر ہاؤسز کا معائنہ کیا۔ معائنے کے دوران وئیر ہاؤس کی خستہ حالی، آئسکریم ہینڈلنگ کے ناقص انتظامات اور حفظانِ صحت کے اصولوں کی سنگین خلاف ورزیوں پر فوری کارروائی کرتے ہوئے والز آئسکریم کے وئیر ہاؤس کو سیل کر دیا گیا۔

(جاری ہے)

اس موقع پر ڈسٹرکٹ فوڈ کنٹرولر مظفرآباد ابرار احمد میر نے میڈیاکوبتایاکہ غیر معیاری آئسکریم کا استعمال بچوں میں پیٹ کی خرابی، جلدی الرجی، جگر و گردوں کے امراض اور بڑوں میں معدے و دل کے مسائل پیدا کر سکتا ہے۔فوڈ اتھارٹی نے شہریوں سے اپیل کی ہے کہ وہ آئسکریم خریدتے وقت برانڈ، ایکسپائری ڈیٹ، اور فوڈ لائسنس نمبر ضرور چیک کریں اور غیر رجسٹرڈ یا غیر معیاری مصنوعات سے اجتناب کریں۔عوام کی سہولت کے لیے فوڈ اتھارٹی کی ہیلپ لائن اور سوشل میڈیا پلیٹ فارمز پر شکایات درج کروائی جا سکتی ہیں۔