سعودی عرب او آئی سی کے آبی وسائل کے وزرا کی کانفرنس کی میزبانی کرے گا

مقصد او آئی سی کے رکن ملکوں کے درمیان تعاون اور شراکت داری کو فروغ دینا ہے،رپورٹ

اتوار 12 اکتوبر 2025 16:00

ریاض(اُردو پوائنٹ اخبارتازہ ترین - این این آئی۔ 12 اکتوبر2025ء) سعودی عرب جدہ میں اسلامی تعاون تنظیم(او آئی سی)ممالک کے آبی وسائل کے وزرا کی کانفرنس کی میزبانی کرے گا جو 20 سے 22 اکتوبر تک جاری رہے گی۔عرب ٹی وی کے مطابق کانفرنس کا مقصد او آئی سی کے رکن ملکوں کے درمیان تعاون اور شراکت داری کو فروغ دینا ہے۔ایس پی اے کے مطابق کانفرنس کے اہم موضوعات جن پر بات کی جائے گی ان میں پائیدار آبی وسائل کی منصوبہ بندی اور انتظام میں جدید ٹیکنالوجی اور ڈیجیٹل ٹرانسفارمیشن سے فائدہ اٹھانا شامل ہے۔

ایجنڈے میں پانی کے مشترکہ اقدامات اور منصوبوں کی ترقی، پانی کے شعبے میں سرمایہ کاری اور فنانسنگ کی حوصلہ افزائی کے ساتھ جدید اور پائیدار فنانسنگ میکنانزم کی تلاش پر بھی توجہ مرکوز کی جائے گی۔

(جاری ہے)

یہ کوششیں اسلامی ملکوں میں آبی تحفظ اور پائیداری کو بڑھانے کے لیے اہم ہیں۔اس کانفرنس کی صدارت پانی کے اہم چیلنجوں سے نمٹنے میں سعودی عرب کے اہم علاقائی اور بین الاقوامی کردار کو ظاہر کرتی ہے۔

سعودی عرب واٹر سکیورٹی کے حصول، ماحولیاتی پائیداری کی سپورٹ اور آبی وسائل کے انتظام کی کارکردگی کو بہتر بنانے کے لیے قومی حکمت عملی پر علملدرآمد کرتے ہوئے پانی کے شعبے کو بہت اہمیت دیتا ہے۔واضح رہے سعودی عرب نے 60 سے زیادہ ملکوں میں 200 سے زیادہ آبی منصوبوں کو 6 ارب ڈالر فراہم کیے ہیں۔ سعودی عرب ورلڈ واٹر کونسل کے تعاون سے ورلڈ واٹر فورم 2027 کی میزبانی کی بھی تیاری کر رہا ہے۔