محکمہ زراعت کی گندم کی زیادہ پیداوار کےلئے سفارشات جاری

پیر 13 اکتوبر 2025 15:38

لاہور (اُردو پوائنٹ اخبارتازہ ترین - اے پی پی۔ 13 اکتوبر2025ء) محکمہ زراعت نے گندم کی زیادہ پیداوار کےلئے سفارشات جاری کر دی ہیں ۔ترجمان محکمہ زراعت پنجاب کے مطابق بارانی علاقوں میں گندم کی کاشت کا وقت15 اکتوبر تا15 نومبر ہے۔بارانی علاقوں کے کاشتکار بارش کے پانی کو محفوظ کرنے کےلئے گہرا ہل چلائیں تاکہ بوقتِ کاشت وتر مہیا ہو سکے،کم بارش والے علاقوں میں راجن پور، لیہ،ڈیرہ غازی خان،مظفر گڑھ، میانوالی،بھکر، خوشاب، جنڈ اور پنڈی گھیب شامل ہیں۔

درمیانی بارش والے علاقوں میں چکوال،تلہ گنگ اور پنڈ دادن خان جبکہ ، زیادہ بارش والے علاقوں میں راولپنڈی، اٹک، جہلم،سوہاوہ،ناروال، گجرات اور کھاریاں کے علاقے شامل ہیں۔ترجمان کے مطابق بارانی علاقوں کے کاشتکار زمین کی تیاری شروع کریں، اگر گلی سٹری کھاد نہ ڈالی ہو تو فورا ڈال لیں اور زمین میں اچھی طرح ملا دیں۔

(جاری ہے)

ترجمان نےکہا ہے کہ بارانی علاقوں میں گندم کی کاشت کیلئے محکمہ زراعت کی منظور شدہ اقسام شیراز23،مرکز19،ایم اے 21،نشان 21،عروج 22،بارانی17،فتح جنگ16 اور پاکستا ن 13ہیں،کاشتکار گندم کی زیادہ پیداوار کیلئے صرف محکمہ زراعت پنجاب کی منظور شدہ اقسام کا40 تا50 کلوگرام تصدیق شدہ بیج استعمال کریں۔

گندم کی کاشت سے قبل بیج کو محکمہ زراعت توسیع کے مقامی ماہرین کے مشورہ سے زہرآلود کرلیں تاکہ گندم کی فصل کیڑوں سے محفوظ رہے۔گندم کی بوائی کیلئے بیج کو صاف کر کے استعمال کریں۔