ریاض ایکسپو 2030 کی تیاریاں، جاپان نے ایکسپو کا پرچم سعودی عرب کو منتقل کر دیا

منگل 14 اکتوبر 2025 10:50

ٹوکیو (اُردو پوائنٹ اخبارتازہ ترین - اے پی پی۔ 14 اکتوبر2025ء) جاپان میں منعقدہ ایکسپو 2025 اوساکا کی اختتامی تقریب کے دوران بین الاقوامی نمائش بیورو کا پرچم باضابطہ طور پر سعودی عرب کو منتقل کر دیا گیا ہے۔اردو نیوز کے مطابق اختتامی تقریب چھ ماہ تک جاری رہنے والی سرگرمیوں، ثقافتی مکالموں اور دنیا بھر سے شریک ممالک و وفود کے اجتماع کے بعد منعقد ہوئی ہے۔

یہ اقدام نمائش کی میزبانی کی ذمہ داریوں کے باضابطہ منتقلی کی علامت ہے جس کے ساتھ ہی سعودی عرب نے 2030 میں غیرمعمولی ایونٹ کے انعقاد کی تیاریوں کا آغاز کر دیا ہے۔ ایکسپو 2030 ریاض دنیا بھر کے لیے عالمی پلیٹ فارم فراہم کرے گا، جہاں جدید اور پائیدار حل کی نمائش، پائیدار ترقی کے اہداف کے فروغ اور جامع ترقی کے لیے کوششوں کو سراہا جائے گا۔

(جاری ہے)

یہ نمائش سعودی عرب میں جاری تبدیلی اور ترقی کے وژن کی بنیادوں کو مضبوط کرے گی جو خادمِ حرمین شریفین شاہ سلمان بن عبدالعزیز آل سعود اور ولی عہد شہزادہ محمد بن سلمان بن عبدالعزیز آل سعود کی قیادت و حمایت میں جاری ہے۔اختتامی تقریب میں وزیرِ مملکت اور ریاض رائل کمیشن کے چیف ایگزیکٹیو انجینئر ابراہیم بن محمد السلطان نے بین الاقوامی نمائش بیورو کا پرچم وصول کیا ۔اس موقع پر وزیرِ معیشت و منصوبہ بندی فیصل بن فاضل الابراہیم سعودی عرب کے جاپان میں سفیر ڈاکٹر غازی بن سعید بن زقر اور متعدد معزز شخصیات و حکام بھی موجود تھے۔