یونیورسٹی کے تمام کیمپسز کو عالمی معیار پر لایا جا رہا ہے۔وائس چانسلر

منگل 14 اکتوبر 2025 16:55

رحیم یارخان (اُردو پوائنٹ اخبارتازہ ترین - اے پی پی۔ 14 اکتوبر2025ء) اسلامیہ یونیورسٹی بہاول پور کے وائس چانسلر پروفیسر ڈاکٹر محمد کامران کی زیر سرپرستی کوالٹی انہاسمنٹ سیل کے زیر اہتمام واضح مقاصد اور نتیجہ خیز تعلیمی پروگرام آؤٹ کم بیسڈ ایجوکیشن فریم ورک کے موضوع پر تربیتی ورکشاپ کا انعقادکیاگیا۔ اسی سلسلے میں رحیم یار خان کیمپس میں وائس چانسلر پروفیسر ڈاکٹر محمد کامران نے کیمپس کے اساتذہ اور ملحقہ کالجز کے پرنسپل اور فیکلٹی کو خصوصی لیکچر دیا اور نتائج و مقاصد پر مبنی تعلیمی پروگرام اور روایتی تدریس کا موازنہ کیا۔

انہوں نے ہائر ایجوکیشن کمیشن کے معیارات اور عالمی رجحانات کے مطابق بامقصد طریقہ تدریس پر تفصیلی گفتگو کی۔ پروفیسر ڈاکٹر محمد کامران نے درس و تدریس کے جدید رجحانات پر اظہارخیال کیا جن کا مقصد طلباء وطالبات کو واضح اور نتائج پر مبنی دیرپا تعلیم دینا ہے ۔

(جاری ہے)

انہوں نے کہا کہ ملحقہ کالجز میں بھی معیار تعلیم درس و تدریس کو کیمپس کے برابر لانا ہے۔

اسی مقصد کے لیے ملحقہ کالجز کے اساتذہ کو بھی مدعو کیا گیا ہے تاکہ ان کی استعداد کار میں اضافہ ہو اور وہ جدید طریقہ تدریس سے متعارف ہو سکیں۔ڈائریکٹر کوالٹی انہاسمنٹ سیل پروفیسر ڈاکٹر محمد اسداللہ مدنی نے کہا کہ وائس چانسلر کی ہدایت پر منعقد کی گئی اس سرگرمی کا مقصد تعلیمی سیشن کے آغاز پر تمام کیمپسز اور ملحقہ کالجز میں تدریسی شعبہ جات کے سربراہان کو تدریس کے جدید طریقہ کار سے آگاہ کرنا ہے تاکہ اسلامیہ یونیورسٹی بہاول پور کا تدریسی نظام جدید رجحانات کے مطابق تشکیل پا سکے اور طلباء وطالبات اعلی معیاری تعلیم سے مستفید ہو سکیں۔

اس موقع پر پرایئوٹ کالجز ایسوسی ایشن کے صدر فیصل ندیم نے ملحقہ کالجز میں تدریسی معیار میں آضافے اور اساتذہ کے لئے تربیتی پروگرام کے آغاز کو سراہا۔ڈائریکٹر کیمپس رحیم یار خان ڈاکٹر سہیل شریف نے وائس چانسلر کی کیمپس آمد اور فیکلٹی کے خصوصی ٹریننگ اور لیکچر دینے پر وائس چانسلر کا شکریہ ادا کیا۔\378