حالیہ تجربات کے بعد امریکا پر بھروسہ ممکن نہیں،ایران

بدھ 15 اکتوبر 2025 10:10

تہران (اُردو پوائنٹ اخبارتازہ ترین - اے پی پی۔ 15 اکتوبر2025ء) ایران نے ایک بار پھر امریکا پر عدم اعتماد کا اظہار کرتے ہوئے کہا ہے کہ حالیہ تجربات کے بعد ایران امریکا کو قابلِ اعتماد فریق نہیں سمجھتا۔ العربیہ اردو کے مطابق یہ بات ایرانی صدر کے دفتر کے ڈپٹی ڈائریکٹر برائے اطلاعات مہدی طباطبائی نے ایک بیان میں کہی۔ انہوں نے کہا ہے کہ حکومت کا مؤقف ہے کہ امریکا پر اب بھروسہ نہیں کیا جا سکتا کیونکہ اس نے اپنے وعدے توڑے اور حالیہ فوجی حملے نے اعتماد کو ختم کردیا۔

(جاری ہے)

ان کا اشارہ ان امریکی حملوں کی جانب تھا جو جون میں ایران کی جوہری تنصیبات پر کیے گئے تھے۔ ایرانی عہدیدار نے بتایا کہ ایرانی وفد کے پاس نیویارک میں اقوامِ متحدہ کی جنرل اسمبلی کے اجلاس کے دوران امریکی نمائندوں سے ملاقات کا موقع موجود تھا مگر اس نے بات چیت کی کوئی درخواست نہیں دی۔ یہ بیان ایسے وقت میں سامنے آیا ہے جب ایرانی وزیر خارجہ عباس عراقچی نے کہا کہ واضح ہو چکا ہے کہ امریکی صدر ڈونلڈ ٹرمپ ایران کے پرامن جوہری پروگرام کے بارے میں غلط معلومات سے متاثر ہوئے۔ اس سے قبل ایرانی وزارتِ خارجہ نے ٹرمپ کی مذاکرات کی پیشکش کو ’’غیر مخلصانہ‘‘قرار دیتے ہوئے کہا تھا کہ ان کی پالیسی اور طرزِ عمل ایران مخالف ہیں۔