مڈغاسکر میں احتجاجی مظاہرین نے حکومت کا تختہ الٹ دیا

حکومت مخالف مظاہروں کے بعد صدر فرار، پارلیمنٹ تحلیل،فوج نے قبضہ کر لیا

بدھ 15 اکتوبر 2025 15:20

انٹاریوو(اُردو پوائنٹ اخبارتازہ ترین - این این آئی۔ 15 اکتوبر2025ء) افریقی ملک مڈغاسکر میں جنریشن جی نے حکومت کا تختہ الٹ دیا، نوجوانوں کی قیادت میں ہونے والے حکومت مخالف مظاہروں کے بعد فوج نے اقتدار سنبھال لیا جبکہ صدر اینڈری راجولینا ملک سے فرار ہوگئے۔

(جاری ہے)

فوجی ترجمان کرنل مائیکل راندریانرینا نے سرکاری ٹیلی ویژن پر خطاب کرتے ہوئے پارلیمنٹ کو تحلیل کرنے کا اعلان کیا، ان کا کہنا تھا کہ فوجی کونسل آئندہ 2 سال کے دوران اصلاحات اور نئے انتخابات کا لائحہ عمل طے کرے گی۔

ملک بھر میں 20 روز سے جاری مظاہروں میں ہزاروں نوجوان شریک تھے جن میں اکثریت جنریشن زی (Gen Z) کی تھی۔ مظاہرین مہنگائی، کرپشن، خراب حکمرانی اور بنیادی سہولتوں کی کمی کے خلاف احتجاج کر رہے تھے۔خبر ایجنسی کے مطابق مڈغاسکر میں 25 ستمبر سے جاری مظاہروں میں اب تک 22 افراد ہلاک ہو چکے ہیں۔اقوام متحدہ اور افریقی یونین نے مڈغاسکر میں جمہوری عمل کے احترام پر زور دیتے ہوئے تحمل اختیار کرنے کی اپیل کی ہے۔