گورنمنٹ کالج آف مینجمنٹ سائنسزاینڈ کامرس ایجوکیشن ایبٹ آباد میں سالانہ تقسیم انعامات کی تقریب

بدھ 15 اکتوبر 2025 19:52

ایبٹ آباد (اُردو پوائنٹ اخبارتازہ ترین - اے پی پی۔ 15 اکتوبر2025ء) گورنمنٹ کالج آف مینجمنٹ سائنسز اینڈ کامرس ایجوکیشن ایبٹ آباد میں سالانہ تقسیم انعامات اور پرنسپل پروفیسر سید تصدیق حسین شاہ کی الوداعی تقریب کا انعقاد کیا گیا۔مہمان خصوصی ڈائریکٹر جنرل کامرس ایجوکیشن اینڈ مینجمنٹ سائنسز خیبر پختونخوا عمر علی خان تھے۔تقریب میں سابق ڈائریکٹر جنرل کامرس پروفیسر محمد ندیم،کنٹرولر پروفیسر محمد ادریس،پرنسپل گرلز کالج ارم نثار،پروفیسر ڈاکٹر شفیق الرحمن عباسی کے علاوہ ہزارہ سمیت صوبہ کے کامرس کالجز کے پرنسپلز ،پروفیسرز طلباء وطالبات شریک تھے۔

تقریب میں سالانہ امتحان بی بی اے فائنل اور مختلف سمسٹرز میں پہلی دوسری اور تیسری پوزیشن حاصل کر نے اور ہم نصابی سرگرمیوں میں نمایاں رہنے والے طلباء وطالبات کو تعریفی اسناد اور سکالرز شپ حاصل کرنے والے طلبہ میں چیک تقسیم کئے گئے۔

(جاری ہے)

تقریب میں کالج ہذا کے پرنسپل پروفیسر سید تصدیق حسین شاہ کی مدت ملازمت1991 سے2025 تک خدمات پر روشنی ڈالی گئی۔

مقررین نے ان کی چترال،ہری پور،مانسہرہ اور ایبٹ آباد میں بطور پرنسپل خدمات کو سراہا۔اس موقع پر ڈائریکٹر کامرس ایجوکیشن اینڈ مینجمنٹ سائنسز پروفیسر عمر علی خان نے اپنے خطاب میں کہاکہ سید تصدیق حسین شاہ ایک بہترین منتظم تھے۔ ان کا انتظامی خلا پر نہیں کر سکتا۔ان کا نعم البدل ملنا مشکل ہے۔کوشش رہے گی صوبہ میں کامرس کالجز میں تدریسی عمل کو بہتر سے بہتر بنا سکیں۔

انہوں نے کہا ہے کہ طلبہ ڈگری کے ساتھ ڈپلومہ بھی کریں تاکہ عملی زندگی میں روزگار کا بہترین ذریعہ حاصل کر سکیں ۔انہوں نے کہا ہے کہ کامرس ایجوکیشن سے جڑے طلبہ کا مستقبل روشن ہے لیکن والدین اور معاشرہ اس کی افادیت سے لاعلم ہیں۔ہمارا فرض بنتا ہےکہ گریجویٹس کی ایسی تربیت کریں جو ادارہ کے سفیر بنیں ،والدین بھی فخر محسوس کریں کہ ان کی اولاد کامرس کالج سے فارغ التحصیل ہے۔دریں اثنا مقررین اور طلباء نے پرنسپل سید تصدیق شاہ کی خدمات پر روشنی ڈالی اور خصوصی تحائف بھی دیئے۔خیبر پختونخوا کامرس کالجز ٹیچرز ایسوسی ایشن کے صدر وحید خٹک اور جنرل سیکرٹری پروفیسر ڈاکٹر شفیق الرحمن عباسی کی طرف سے بھی پرنسپل سید تصدیق شاہ کو خصوصی شیلڈ پیش کی گئی۔