پورٹل بلاک رکھنے کی صورتحال جاری رہنے سے مارکیٹ میں چینی کا شدید بحران پیدا ہو جائیگا‘ شوگر ملز ایسوسی ایشن

جمعرات 16 اکتوبر 2025 18:08

لاہور(اُردو پوائنٹ اخبارتازہ ترین - این این آئی۔ 16 اکتوبر2025ء) پاکستان شوگر ملز ایسوسی ایشن نے وفاقی وزیر خزانہ اور وزیر برائے نیشنل فوڈ سکیورٹی کو تیسرا خط تحریر کر تے ہوئے کہا ہے کہ شوگر انڈسٹری ایف بی آر کے پورٹل کی بندش کے ذریعے چینی کی فروخت روکنے کے خلاف بار بار احتجاج کر رہی ہے۔ترجمان نے کہاکہ خطوط کے ذریعے درخواست کی گئی کہ حکومت اس معاملے میں مداخلت کرے اور ایف بی آر کو پورٹل کو بلاک نہ کرنے اور تمام پابندیاں ہٹانے کی ہدایات جاری کرے تاکہ شوگر ملز سے مارکیٹ میں چینی کی روانی کو یقینی بنایا جا سکے۔

ترجمان کے مطابق14 اکتوبر کو وزارت نیشنل فوڈ سکیورٹی میں ہونے والی میٹنگ کے دوران شوگر ملز ایسوسی ایشن کی جانب سے دوبارہ اس مسئلے کو اجاگر کیا گیا جہاں انڈسٹری سے یہ وعدہ کیا گیا کہ میٹنگ کے بعد ایف بی آر سے رابطہ کیا جائے گا اور اس بات کو یقینی بنایا جائے گا کہ پورٹل دوبارہ بلاک نہ ہو۔

(جاری ہے)

مگرایف بی آر کا پورٹل تا حال بلاک ہے۔پورٹل کی یہی صورتحال اگر جاری رہی تو مارکیٹ میں شدید بحران پیدا ہو جائے گا۔ چینی کی شوگر ملز سیلفٹنگ پر پابندی سے مارکیٹ میں چینی ناپید ہو جائے گی اور قیمتیں بڑھیں گی جس کیلئے شوگر انڈسٹری کو ذمہ دار نہیں ٹھہرایا جا سکتا۔ حکومت سے درخواست ہے کہ ایف بی آر کو پورٹل بلاک نہ کرنے اور تمام پابندیاں ہٹانے کی ہدایات جاری کی جائیں۔