سعودی عرب کے سٹار فٹبالرسالم الدوسری دوسری مرتبہ اے ایف سی پلیئر آف دی ایئر ایوارڈ جیت لیا

جمعہ 17 اکتوبر 2025 08:30

ریاض (اُردو پوائنٹ اخبارتازہ ترین - اے پی پی۔ 17 اکتوبر2025ء) سعودی عرب کی قومی فٹبال ٹیم کے سٹار فٹ بالر اور الہلال فٹ بال کلب کے کپتان سالم الدوسری نے دوسری مرتبہ اے ایف سی پلیئر آف دی ایئر ایوارڈ جیت لیا۔ریاض کے کنگ فہد کلچرل سینٹر میں ایشین فٹبال فیڈریشن کی جانب سے سالانہ ایوارڈ کی تقریب منعقد کی گئی۔الاخباریہ کے مطابق سالم الدوسری نے مملکت کی قیادت کی جانب سے سپورٹس اور کھلاڑیوں کی بھر پور حوصلہ افزائی پر خصوصی شکریہ ادا کیا۔

ان کا کہنا تھا کامیابی کا یہ سفر اختتام نہیں بلکہ بڑی کامیابیوں کا آغاز ہے، وطن عزیز کا نام عالمی سطح پر روشن کرنے کےلیے ہمیشہ کوشاں رہوں گا۔سالم الدوسری کے مد مقابل قطر کے دو مرتبہ کے فاتح اکرم عفیف اور ملائیشیا کے عارف ایمن تھے،جن کے درمیان اے ایف سی پلیئر آف دی ایئر ایوارڈ کے لئے سخت مقابلہ ہوا۔

(جاری ہے)

سالم الدوسری نے 2022 کے فیفا فٹبال ورلڈ کپ میں سعودی عرب اور ارجنٹائن کے درمیان کھیلے گئے میچ میں فیصلہ کن گول کر کے تاریخ رقم کرتے ہوئے سعودی عرب کو جیت دلوائی تھی۔

علاوہ ازیں ایشین فٹبال کنفیڈریشن( اے ایف سی) نے سعودی فٹبال فیڈریشن کو براعظم کی بہترین فیڈریشن 2025 کے اعزاز سے نوازا ہے۔وزیرسپورٹس شہزادہ عبدالعزیز بن ترکی الفیصل کی موجودگی میں سعودی فٹبال فیڈریشن کے سربراہ یاسر المسحل کو ایوارڈ دیا گیا۔اس موقع پر ایشیا کپ کے بہترین کھلاڑی، بہترین کوچ اور بہترین نوجوان کھلاڑی(مرد و خواتین) کے علاوہ بہترین لیڈیز کوچ کے ایوارڈ بھی فاتحین کو دیے گئے۔