فلمی کردار کو ٹھکرانے پر آج بھی افسوس ہے،جینیفر لوپیز

جمعہ 17 اکتوبر 2025 13:38

نیویارک (اُردو پوائنٹ اخبارتازہ ترین - این این آئی۔ 17 اکتوبر2025ء) ہالی ووڈ گلوکارہ اور اداکارہ جینیفر لوپیز نے انکشاف کیا ہے کہ انہوں نے ایک ایسا فلمی کردار ٹھکرا دیا تھا جو بعد میں اسے ادا کرنے والی اداکارہ کے لیے آسکر ایوارڈ کی نامزدگی کا سبب بنا اور آج بھی میں اس فیصلے کو یاد کر کے دکھ محسوس کرتی ہیں۔غیر ملکی میڈیا کے مطابق جینیفر لوپیز نے یہ اعتراف ایک ریڈیو شو میں کیا ہے اور بتایا ہے کہ ایک فلم کی پیشکش تھی جسے انہوں نے ٹھکرا دیا تھا کیونکہ وہ سمجھتی تھیں کہ اس کا اسکرپٹ اچھا نہیں تھا۔

جینیفر لوپیز کو میوزیکل ڈرامہ فلم کِس آف دی اسپائیڈر ویمن میں اپنے معاون کردار کے لیے آسکر کی نامزدگی کی توقع ہے، لیکن وہ ایک بار ایک ایسا کردار ٹھکرا چکی ہیں جس نے بالآخر ایک اور اداکارہ کو آسکر نامزدگی دلائی تھی۔

(جاری ہے)

انہوں نے بتایا کہ جسے میں نے ٹھکرایا تھا وہ 2002 کی فلم ان فیتھ فل تھی، جس کے ہدایت کار ایڈرین لائن تھے جبکہ میرے انکار کے بعد یہ کردار ڈائین لین نے نبھایا تھا، اس کا اسکرپٹ مجھے اچھا نہیں لگا تھا اور پھر اسی کردار کے لیے ڈائن لین کو آسکر ایوارڈ کے لیے نامزد کیا گیا تھا۔

جینیفر نے کہا کہ یہ بات واقعی مجھے ستاتی ہے کہ آخر میں نے ایڈرین لائن کے ساتھ کام کرنے سے انکار کیوں کیا مجھے خود بھی نہیں پتہ کہ اس وقت میرے ذہن میں کیا چل رہا تھا، شاید میں خود کو نہیں سمجھ پائی تھی۔واضح رہے کہ ڈائین لین کو اس فلم کی وجہ سے آسکرز کے لیے بہترین اداکارہ کے طور پر، نکول کڈمین کو فلم دی آورز کے لیے، جولیان مور کو فلم فار فرام ہیون کے لیے، سلمی ہائیک کو فلم فریدہ کے لیے اور رینی زیلویگر کو فلم شکاگو کے لیے نامزد کیا گیا تھا، تاہم اس سال نکول کڈمین نے آسکر جیتا تھا، جبکہ جینیفر لوپیز تاحال آسکر کے لیے نامزد نہیں ہوئی ہیں۔

جینیفر لوپیز کی نئی میوزیکل ڈرامہ فلم کِس آف دی اسپائیڈر ویمن ارجنٹینا کی 1980 کی دہائی کی خانہ جنگی کے دوران قید ایک سیاسی قیدی کی کہانی ہے، فلم 10 اکتوبر 2025 کو سنیما گھروں کی زینت بنی ہے۔