سعودی عرب میں 13 نومبر سے ہفتہ دستکاری منایا جائے گا

یہ ایونٹ 2025 کودستکاری کا سال کے طور پر منائے جانے کا ایک حصہ ہے،حکام

جمعہ 17 اکتوبر 2025 13:12

ریاض(اُردو پوائنٹ اخبارتازہ ترین - این این آئی۔ 17 اکتوبر2025ء) سعودی عرب میں 13 نومبر سے ہفتہ دستکاری منایا جائے گا۔ اردو نیوزکے مطابق سعودی انٹرنیشنل ہینڈی کرافٹ ویک جسے بنان بھی کہا جاتا ہے، کا تیسرا ایڈیشن 13 تا 26 نومبر کو وزیرِ ثقافت شہزادہ بدر بن عبداللہ بن فرحان کی زیرِ سرپرستی ریاض میں منعقد ہوگا۔ اس ایونٹ میں 40 سے زیادہ ممالک کی شرکت متوقع ہے۔

اس کے علاوہ 400 سے زیادہ مقامی دستکار اور 20 پارٹنر بھی شریک ہوں گے۔یہ ایونٹ 2025 کودستکاری کا سال کے طور پر منائے جانے کا ایک حصہ ہے جس کا مقصد مقامی کاروباری افراد کو بااختیار بنانا اور مارکیٹ میں ان کی موجودگی کو بڑھانا اور ہنر کا بہتر استعمال کرنے کا موقع فراہم کرنا ہے۔نومبر میں منائے جانے والے ہفتہ دستکاری میں چین اعزازی مہمان کے طور پر شرکت کرتے ہوئے دستکاری کے ہنر میں اپنی قومی روایات کی نمائش کرے گا۔

(جاری ہے)

سعودی وزیر ثقافت شہزادہ بدر جو سعودی ہیریٹِج کمیشن کے چیئرمین بھی ہیں، نے اعلان کیا ہے کہ شام اس ایونٹ میں پہلی مرتبہ شریک ہوگا اور اپنے روایتی آرٹ اور پروڈکٹس کو دنیا کے سامنے نمائش کے لیے پیش کرے گا۔اس ایونٹ میں دستکاروں کا گھر انیشی ایٹوپر بھی توجہ مرکوز رہے گی جو مملکت میں ہنرمند کاریگروں کو تعاون فراہم کرتا ہے۔ہیریٹج اتھارٹی کی جانب سے سعودی وژن 2030 کے اہداف کو مدنظر رکھتے ہوئے مقامی دستکاری کو فروغ دینے کے لیے بنان ویک کا سالانہ بنیادوں پر انعقاد کیا جاتا ہے جس کا مقصد مملکت کی دستکاری کی صنعت کو عالمی سطح پر متعارف کرانا اور فنکاروں کے فن کو نمایاں کرنا ہے۔

بنان دستکاری ویک میں مقامی اور عالمی دستکاری کی مصنوعات پیش کی جائیں گی جبکہ اس موضوع پر مختلف ورکشاپس کا بھی اہتمام کیا جائے گا۔ خصوصی پویلین ایئرآف ہینڈی کرافٹ انیشی ایٹو 2025 کے عنوان سے قائم کیا جائے گا اس کے علاوہ ننھے دستکاروں کے لیے جگہ مخصوص کی گئی ہے۔