وزیر خزانہ کی دی کرنسی ایکسچینج فنڈ کے وفد سے ملاقات،مقامی کرنسی میں قرض فراہمی اور مینجمنٹ حکمت عملی پر تبادلہ خیال کیا

ٹی سی ایکس کے ساتھ شراکت سے پاکستان میں مقامی کرنسی پر مبنی قرضوں کے تحفظ کو مزید مضبوطی ملے گی،محمداورنگزیب کی گفتگو

جمعہ 17 اکتوبر 2025 22:10

واشنگٹن ڈی سی(اُردو پوائنٹ اخبارتازہ ترین - این این آئی۔ 17 اکتوبر2025ء) وفاقی وزیرخزانہ سینیٹر محمد اورنگزیب نے ٹی سی ایکس (دی کرنسی ایکسچینج فنڈ)کے وفد سے ملاقات کی۔ملاقات میں ٹی سی ایکس کی قیادت ادارے کے چیف انویسٹمنٹ آفیسر اور ڈپٹی سی ای او عثمان بوقرامی نے کی۔ملاقات میں مقامی کرنسی میں قرض فراہمی اور قرض مینجمنٹ حکمت عملی پر تبادلہ خیال کیا گیا۔

وزیر خزانہ کو ڈالر کے بجائے مقامی کرنسی میں فنانسنگ سہولت کے حوالے سے ٹی سی ایکس کے آپریشنز پر تفصیلی بریفنگ دی گئی۔

(جاری ہے)

وزیر خزانہ نے ٹی سی ایکس کے ساتھ شراکت کو خوش آئند قرار دیتے ہوئے کہاکہ ٹی سی ایکس کے ساتھ شراکت سے پاکستان میں مقامی کرنسی پر مبنی قرضوں کے تحفظ کو مزید مضبوطی ملے گی۔محمداورنگزیب نے کہاکہ پاکستان اپنی اندرونی اور بیرونی قرضہ جاتی ذمہ داریوں کی مدت میں توسیع کا خواہاں ہے،اس کا مقصد ری فنانسنگ اور شرح سود کے خطرات کو کم کرنا ہے۔

انہوںنے کہاکہ پاکستان بین الاقوامی کیپٹل مارکیٹس تک رسائی کیلئے پانڈا بانڈز، یوروبانڈز اور بین الاقوامی سکوک کے اجرا پر کام کر رہا ہے۔انہوںنے کہاکہ ٹی سی ایکس کی جانب سے وزارت خزانہ کو جمع کرائی گئی تجاویز پر تفصیلی فالو اپ کیا جائے گا۔ مستقبل میں تعاون کو مزید فروغ دیا جائے گا۔