مشرف کی جلاوطنی وفیض حمید کی قید خوشی کا نہیں عبرت کا مقام ہے، غلط کاموں کا نتیجہ غلط ہی نکلتا ہے

جمہوری نظام اور آئینی حکمرانی کو تلپٹ کرنے والے یہ دونوں افراد تنہا نہیں تھے، یہ معاملہ محض فیض حمید کی سزا پر نہیں رک سکتا، حساب کتاب کا روڈ رولر حرکت میں آتا رہے گا، خواجہ سعد رفیق

ثنااللہ ناگرہ ہفتہ 13 دسمبر 2025 21:23

مشرف کی جلاوطنی وفیض حمید کی قید خوشی کا نہیں عبرت کا مقام ہے، غلط کاموں ..

لاہور( اردوپوائنٹ اخبار تازہ ترین۔ انٹرنیشنل پریس ایجنسی۔ 13 دسمبر 2025ء ) مسلم لیگ ن کے رہنماء خواجہ سعد رفیق نے کہا ہے کہ مشرف کی جلاوطنی وفیض حمید کی قید خوشی کا نہیں عبرت کا مقام ہے، غلط کاموں کا نتیجہ غلط ھی نکلتا ہے۔ ایکس پر انہوں نے اپنے ٹویٹ میں کہا کہ جنرل پرویز مشرف کی جلا وطنی و تنہائی اور جنرل فیض حمید کی سزاۓ قیدخوشی کا نہیں ، عبرت کا مقام ھے ، غلط کاموں کا نتیجہ جلد یا بدیر غلط ھی نکلتا ھے۔

مجھ سمیت جنرل فیض حمید کے بیشتر متاثرین اس موقع پر استغفار کا ورد کر رھے ھیں جبکہ جنرل فیض حمید سے مسلسل فیض یاب ھونیوالے اور ان کے اشارہ ابرو پر رقص کرتے ھوئے ھم پر حملے کرنیوالے پیشہ ور رقاص اب اسی شدت کے ساتھ راگ درباری کا الاپ کرتے ھوۓ اپنے سابقہ باس کی سزا پر داد و تحسین کے نعرے لگا رہے ہیں ۔

(جاری ہے)

یاد رھے کہ پاکستان کے جمہوری نظام اور آئینی حکمرانی کو تلپٹ کرنے والے یہ دونوں افراد تنہا نہیں تھے ، بہت سے جرنیل ، جج ، جرنلسٹ اور سیاستدان اس بگاڑ کا حصہ ، انکے سہولت کار اور بینیفشری تھے ۔

ھم چاھتے توھیں کہ پھلتے پھولتے اور چلتے چلاتے پاکستان کو بریکس لگوانے والے اور جمہوری عمل کو ڈی ریل کرکے پاکستان کو ناقابل فہم اور عجیب الخلقت جمہوریت کی جانب دھکیلنے والے تمام کرداروں کا محاسبہ ھو۔ مگر معلوم ھونا چاھئیے کہ یہ معاملہ محض جنرل فیض حمید کی سزا پر نہیں رک سکتا ، گزرتے وقت کے ساتھ حساب کتاب کا روڈ رولر حرکت میں آتا رھے گا، بات آگے پیچھے بڑھتی اور پھیلتی چلی جائے گی۔

نتیجہ پاکستان کو باربار نئے عذاب، تنازعات اور طوفان بھگتنا ھونگے؟ افراد ، جماعتیں اور ادارے اپنے اپنے گناہ اور غلطیاں تسلیم کریں، آئندہ کیلئے آئین کو اسکی اصل حالت میں بحال کرکے قانون کی حکمرانی تسلیم کی جائے، عوامی جمہوری نظام اس کی روح سمیت نافذ کیا جائے اور آپس میں دست و گریبان ھونے کی بجائے غربت ، بھوک، نا انصافی، معاشی بدحالی، دھشت گردی، بدامنی ، کرپشن اور اقربا پروری سمیت تمام قومی مصائب کے خاتمے کیلئے مشترکہ جدوجہد کی جائے۔ دشمنوں میں گھِرا ھوا ، غربت کی دلدل میں دھنسا ھوا اور دھشت گردی کی آگ سے جھُلسا ھوا نیوکلئیر پاکستان اندورنی تضادات، تنازعات اور مزید اختلافات کا متحمل نہیں ھو سکتا۔