)وفاقی وزیر اطلاعات عطاء اللہ تارڑ کی میاں منظور وٹو کی رہائش گاہ آمد، اہل خانہ سے اظہارِ تعزیت اور فاتحہ خوانی

۷منظور وٹو نے شائستگی اور رواداری کی سیاست کو فروغ دیا، ان کی خدمات ہمیشہ یاد رکھی جائیں گی، عطاء اللہ تارڑ

ہفتہ 24 جنوری 2026 21:40

لاہور (اُردو پوائنٹ اخبارتازہ ترین - آن لائن۔ 24 جنوری2026ء) وفاقی وزیر اطلاعات و نشریات عطاء اللہ تارڑ نے سابق وزیراعلیٰ پنجاب میاں منظور وٹو کے انتقال پر گہرے دکھ اور افسوس کا اظہار کرتے ہوئے ان کی رہائش گاہ کا دورہ کیا اور سوگوار خاندان سے تعزیت کی۔وفاقی وزیر نے میاں منظور وٹو کی اہلیہ اور بچوں سے ملاقات کی، جن میں ڈی جی پیمرا پنجاب عائشہ منظور وٹو، سابق ایم این اے روبینہ وٹو، جہاں آراء وٹو، معظم وٹو، خرم وٹو اور بلال احمد ورک شامل تھے۔

عطاء اللہ تارڑ نے مرحوم کے درجات کی بلندی کے لیے فاتحہ خوانی کی اور پسماندگان کے لیے صبرِ جمیل کی دعا کی۔اس موقع پر گفتگو کرتے ہوئے عطاء اللہ تارڑ نے میاں منظور وٹو کی سیاسی بصیرت کو سراہتے ہوئے کہا کہ وہ ایک منجھے ہوئے سیاستدان اور عوامی خدمت کے جذبے سے سرشار رہنما تھے۔

(جاری ہے)

انہوں نے کہا کہ بطور وزیراعلیٰ پنجاب منظور وٹو کی خدمات قابلِ تحسین ہیں جنہیں طویل عرصے تک یاد رکھا جائے گا۔

وفاقی وزیر نے اپنے خاندان اور مرحوم کے دیرینہ تعلقات کا ذکر کرتے ہوئے کہا کہ میرے دادا، سابق صدرِ مملکت رفیق تارڑ مرحوم کے ساتھ میاں منظور وٹو کا عزت اور احترام کا گہرا رشتہ تھا، جو دہائیوں پر محیط رہا۔عطاء اللہ تارڑ نے مزید کہا کہ میاں منظور وٹو نے ہمیشہ رکھ رکھاؤ، شائستگی اور رواداری پر مبنی سیاست کو فروغ دیا۔ انہوں نے سیاسی میدان میں ہمیشہ برداشت اور جمہوری اقدار کے دائرے میں رہتے ہوئے اپنا کردار ادا کیا، جو آج کے سیاستدانوں کے لیے ایک مثال ہے۔وفاقی وزیر نے کہا کہ میاں منظور وٹو کی وفات سے پاکستان ایک زیرک اور وضع دار سیاستدان سے محروم ہو گیا ہے، ان کی کمی ہمیشہ محسوس کی جائے گی