اوپن یونیورسٹی کے ایم ایس، ایم فل اور پی ایچ ڈی پروگرامز کے انٹری ٹیسٹ کا شیڈول جاری

بدھ 11 فروری 2026 22:36

اسلام آباد (اُردو پوائنٹ اخبارتازہ ترین - اے پی پی۔ 11 فروری2026ء) علامہ اقبال اوپن یونیورسٹی نے سمسٹر بہار 2026ء کے لیے ایم ایس، ایم فل اور پی ایچ ڈی پروگرامز میں داخلوں کے سلسلے میں انٹری ٹیسٹ کا شیڈول جاری کر دیا ہے۔ یونیورسٹی انتظامیہ کے مطابق مختلف کلیات کے انٹری ٹیسٹ فروری کے آخری ہفتے میں منعقد کیے جائیں گے۔شیڈول کے مطابق کلیہ عربی و علوم اسلامیہ کے انٹری ٹیسٹ 23 فروری، فیکلٹی آف ایجوکیشن کے 24 فروری، فیکلٹی آف سوشل سائنسز کے 25 فروری جبکہ فیکلٹی آف سائنسز کے انٹری ٹیسٹ 26 فروری کو منعقد ہوں گے۔

انٹری ٹیسٹ اسلام آباد میں یونیورسٹی کے مین کیمپس کے علاوہ گلگت بلتستان، ملتان، کراچی اور کوئٹہ ریجنز میں بھی بیک وقت صبح 9 بجے لیے جائیں گے۔ امیدوار اپنی سہولت کے مطابق کسی بھی قریبی ٹیسٹ سینٹر کا انتخاب کر سکتے ہیں۔

(جاری ہے)

واضح رہے کہ ان پروگرامز میں داخلوں کے لیے درخواستیں 17 فروری تک وصول کی جا رہی ہیں۔ داخلہ فارم اور پراسپکٹس علامہ اقبال اوپن یونیورسٹی کی آفیشل ویب سائٹ پر دستیاب ہیں جبکہ درخواستیں صرف آن لائن موڈ کے ذریعے ہی جمع کروائی جا سکتی ہیں۔یونیورسٹی ترجمان کے مطابق ان پروگرامز میں داخلے کے لیے انٹری ٹیسٹ میں کامیابی کے بعد انٹرویو پاس کرنا بھی لازمی ہوگا۔ ٹیسٹ اور انٹرویوز کے انعقاد میں میرٹ اور شفافیت کو یقینی بنایا جائے گا۔