الحمراء میں دسویں سہ روزہ فیض فیسٹیول کا آغاز

افتتاحی تقریب کو مندوبین کی گفتگو نے باوقار بنا دیا

جمعہ 13 فروری 2026 23:06

لاہور (اُردو پوائنٹ اخبارتازہ ترین - این این آئی۔ 13 فروری2026ء) لاہور آرٹس کونسل میںدسویں سہ روزہ فیض فیسٹیول 2026ء کا باقاعدہ آغاز ہو گیا۔ تین روزہ ادبی و ثقافتی میلہ فیض احمد فیض کی فکر، شاعری اور انسان دوستی کے پیغام کو خراجِ تحسین پیش کرنے کے لیے منعقد کیا جا رہا ہے۔تقریب میں چیئرپرسن فیض فاؤنڈیشن سلیمہ ہاشمی، چیئرمین لاہور آرٹس کونسل الحمرا رضی احمد، ایگزیکٹو ڈائریکٹر لاہور آرٹس کونسل الحمرا محمد نواز گوندل، نامور شخصیات نعیم بخاری، الائیڈ بینک کے ہیڈ اویس بلا، برطانیہ سے تعلق رکھنے والی ادیبہ ممتازہ مہری اور عدیل ہاشمی نے شرکت کی۔

منیزہ ہاشمی بھی افتتاحی تقریب میں موجود تھیں۔چیئرمین الحمرا رضی احمد نے پاکستان اور بیرون ممالک سے آنے والے مندوبین کو خوش آمدید کہا اور اس عزم کا اظہار کیا کہ الحمرا ہمیشہ علم، ادب اور فنونِ لطیفہ کے فروغ میں قائدانہ کردار ادا کرتا رہے گا۔

(جاری ہے)

ایگزیکٹو ڈائریکٹر محمد نواز گوندل نے فیسٹیول کو حکومت پنجاب اور محکمہ اطلاعات و ثقافت پنجاب کی ایک اہم کاوش قرار دیتے ہوئے کہا کہ ایسے پروگرام معاشرے میں فکری بالیدگی اور ثقافتی شعور کو فروغ دیتے ہیں۔

عدیل ہاشمی نے فیض احمد فیض کی نظمیں ترنم سے سنائیں جنہیں حاضرین نے بے حد سراہا، جبکہ نعیم بخاری نے فیض احمد فیض سے منسوب دلچسپ واقعات اور یادیں بیان کیں۔ ممتازہ مہری اور سلیمہ ہاشمی نے فیسٹیول کے شرکاء اور لاہور سمیت پاکستان بھر سے آنے والے افراد کا شکریہ ادا کیا۔ تقریب کی نظامت کے فرائض آمنہ نے نہایت خوبصورتی اور وقار کے ساتھ انجام دیے۔

اس موقع پر معروف کیوریٹر نوین کی مرتب کردہ نمائش کا بھی باقاعدہ افتتاح کیا گیا۔فیسٹیول کی تقریبات تین روز تک الحمرا میں جاری رہیں گی۔ اس تین روزہ میلے میں 40 سیشنز، 25 کتب کی تقاریبِ رونمائی، ورکشاپس، تھیٹر، اوپن مائک، کتاب میلہ، فوڈ اسٹالز، ڈرم سرکل، کلاسیکل رقص، میوزک پرفارمنسز اور دیگر پُروقار سرگرمیاں شامل ہیں، جو اسے ایک ہمہ جہت اور یادگار ادبی و ثقافتی فیسٹیول بنائیں گی۔عوام کی بڑی تعداد ایک نہایت خوشگوار سہ پہر میں الحمراء میں جمع تھے۔تقریب میں مندوبین کی طرف سے کی گئی گفتگو سننے والوںکے لئے یاد گار رہے گی۔